Í fyrsta sinn á Íslandi: Kolbeinn mætir austurrískum rotara í Gamla bíó

Aron Guðmundsson skrifar 7. mars 2026 08:01

Kolbeinn Kristinsson er enn ósigraður á sínum atvinnumannaferli í hnefaleikum og ætlar að berjast hér heima í apríl. Visir/Bjarni

Fyrsta atvinnumannakvöldið í hnefaleikum verður haldið hér á landi í apríl næstkomandi. Þar mun okkar fremsti kappi í íþróttinni, Kolbeinn Kristinsson stíga inn í hringinn. Atvinnumannahnefaleikar eru bannaðir hér á landi samkvæmt lögum sem Kolbeinn segir barn síns tíma. Nú á að kýla á þetta í orðsins fyllstu merkingu og stíga inn í hringinn í Gamla bíó

Þið getið rétt ímyndað ykkur hversu sérstakt það verður fyrir Kolbein og aðra íslenska keppendur að labba inn í salinn í Gamla Bíó og stíga inn í hnefaleikahringinn á fyrsta atvinnumannakvöldinu í íþróttinni í sögu lands og þjóðar.

Fyrir tæpum hundrað árum fór fyrsta hnefaleikamótið hér á landi fram í Gamla Bíói. Einhverjir hafa staðið í þeirri meiningu að atvinnuhnefaleikar séu ólöglegir hér á landi en Kolbeinn segir lögin úrelt.

„Lögin eru bara barn síns tíma. Úrelt. Þau eiga í rauninni ekkert við það sem við erum að fara gera,“ segir Kolbeinn í samtali við íþróttadeild Sýnar.

Eftirbátar annarra landa

Áhugamannahnefaleikar hafa verið heimilaðir hér á landi frá árinu 2002 en áður höfðu hvers kyns hnefaleikar verið bannaðir með öllu frá árinu 1956. Á yfirstandandi þingi liggur fyrir frumvarp frá stjórnarandstöðu sem myndi fella úr gildi lögin frá 1956, og setja ramma um bardagaíþróttir almennt, en það hefur enn ekki náð í gegn.

„Auðvitað er þetta bara síðasta vestræna ríkið þar sem ekki er keppt í atvinnumanna hnefaleikum. Það er bara skrýtið og engin ástæða fyrir því að við eigum ekki að vera berjast hérna. Sérstaklega þegar ég er kominn á þann stað sem ég er kominn. Ég er á meðal topp sextíu bestu í heiminum. Kominn á þennan stað. Af hverju ekki að vera með heimavöll þar sem við getum fengið stærri bardaga, titla og gert allt rosalegt.“

Kolbeinn Kristinsson er í 68.sæti á styrkleikalista þungavigtarkappa á heimsvísu og hefur enn ekki bragðað á ósigri á sínum atvinnumannaferli. Mynd: Kristinn Gauti

Ætlar að rota rotarann

Kolbeinn er enn ósigraður á sínum atvinnumannaferli. Nítján sigrar í nítján bardögum og í Gamla Bíói mætir hann Austurríkismanninum Sasa Milenkovic í tólf lotu bardaga. Sá hefur aðeins tapað einum af þrettán bardögum sínum til þessa. Tólf þeirra hefur hann unnið, þar af ellefu með rothöggi.

„Hann er bara grjótharður. Slær fast og er kominn til að vinna. Við að sigra mig sér hann fram á að tækifæri opnist fyrir sig út í heimi. Stærri bardagar. Maður má ekki taka því rólega.“

Auk Kolbeins berjast fleiri atvinnumenn okkar Íslendinga á kvöldinu. Þeirra á meðal eru Valgerður Guðsteinsdóttir og Emin Kadri.

Emin Kadri og Valgerður Guðsteinsdóttir Vísir/Samsett

Kolbeinn er í toppformi og klár í að sýna hvað í sér býr á heimavelli.

„Maður er bara fullur sjálfstrausts. Ég er búinn að sjá það fyrir mér að ég sé að fara rota hann hérna fyrir framan alla og húsið tryllist. Ég er búinn að sjá það fyrir mér þúsund sinnum.

Maður er búinn að fara um allan heiminn, verða betri í sínu fagi. Svo kemur maður heim og sýnir öllum hversu góður maður er orðinn. Þetta er smá útskriftarveisla.“

Box

Mest lesið

Fleiri fréttir