Reyna að vernda líf á­hafnar annars íransks skips

Að minnsta kosti 87 létu lífið þegar áhöfn bandarísks kafbáts skaut tundurskeyti að freigátunni IRIS Dena á Inlandshafi aðfaranótt miðvikudags og sökkti henni.

Varnarmálaráðherra Bandaríkjanna sagði þetta í fyrsta sinn frá seinni heimsstyrjöldinni sem Bandaríkjamenn sökkva skipi óvinveitts ríkis með tundurskeyti.

Sjá einnig: Sökktu skipi með tundurskeyti í fyrsta sinn frá seinna stríði

Skipinu var sökkt um nítján sjómílur frá hafnarborginni Galle. Áhöfn skipsins hafði verið í heimsókn í Indlandi við æfingar. 32 hefur verið bjargað og tíu er enn saknað.

Efnahagslögsaga er ekki það sama og landhelgi og snýr að réttindum varðandi nýtingu auðlinda. Þó að skip séu í efnahagslögsögu ríkja þýðir það ekki að þau séu ekki á alþjóðlegu hafsvæði. Hægt er að benda á olíuflutningaskipið Marinera, sem stöðvað var af Bandaríkjamönnum í efnahagslögsögu Íslands í upphafi árs.

Sjá einnig: Gerðu áhlaup á rússneskt skuggaskip í efnahagslögsögu Íslands

Samkvæmt frétt Reuters var talsmaður ríkisstjórnar Srí Lanka spurður að því í morgun hvort ríkisstjórnin vissi af öðru írönsku herskipi í efnahagslögsögu ríkisins. Hann sagði svo vera og að verið væri að taka á ástandinu.

„Við erum að gera okkar besta til að varðveita mannslíf,“ sagði Nalinda Jayatissa, umræddur talsmaður.

Abbas Araqchi, utanríkisráðherra Íran, sagði í færslu á X í morgun að Bandaríkjamenn myndu sjá verulega eftir því að hafa sökkt skipinu.