Væri kominn í þúsund mörk ef hann hefði nýtt öll vítin

Al-Nassr vann öruggan 3-1 sigur á Al-Fayha en Ronaldo var ekki meðal markaskorara í þetta skiptið.

Ronaldo tók vítaspyrnu strax á áttundu mínútu en skaut í stöng. Þetta var þriðja vítið sem hann klúðrar með félagsliði eða landsliði á þessu tímabili.

Það þýðir jafnframt að hann stendur áfram í 965 mörkum eða 35 mörkum frá því að ná þúsund mörkum.

Þegar menn fóru að glugga aðeins betur í tölurnar kom í ljós að Ronaldo er búinn að klikka á 35 vítaspyrnum á ferlinum. Ronaldo væri því búinn að upplifa drauminn sinn og kominn í þúsund mörk ef hann hefði nýtt öll vítin sín.

Hann hefur skorað 182 af mörkum sínum úr vítaspyrnum og er því með 84 prósent vítanýtingu.

Ronaldo byrjaði nýja árið í 957 mörkum og er því þegar búinn að skora átta mörk á þessu almanaksári. Þetta er 24. árið í röð sem hann skorar mark á almanaksári.

Hann er líka kominn með fimm hundruð mörk síðan hann hélt upp á þrítugsafmælið sitt sem er meira en flestir af betri markaskorurum sögunnar náðu á öllum sínum ferli.

Ronaldo mun ekki aðeins reyna að ná í þúsund mörkin með Sádí-arabíska félaginu Al-Nassr heldur einnig með portúgalska landsliðinu þar sem hann hefur skorað 143 mörk í 225 landsleikjum.