Skotinn til bana við að ógna lög­reglu­mönnum með hníf og skærum

Maðurinn var samkvæmt frétt AP vopnaður hnífi og skærum. Lögreglumaður er sagður hafa hlotið minni háttar áverka eftir hnífstungu. Atvikið átti sér stað um klukkan 18 að frönskum tíma (17 að íslenskum tíma).

Meintur árásarmaður lést af sárum sínum eftir að hafa orðið fyrir nokkrum skotum frá lögreglumanni, samkvæmt yfirlýsingu frá ríkissaksóknaraembættinu, sem hefur tekið málið til rannsóknar.

Ekki liggur fyrir hversu margir lögreglumenn beittu skotvopni sínu. Enga óbreytta borgara sakaði, að sögn lögreglu.

Hinn grunaði var franskur ríkisborgari fæddur 1978, samkvæmt AP, en hann var árið 2012 dæmdur í Belgíu í 17 ára fangelsi fyrir hryðjuverkatengda glæpi og önnur brot.