Hvalur hf. sýknaður af kröfum þriggja starfs­manna

Fimm fyrrverandi starfsmenn Hvals hf. höfðuðu mál gegn Hval hf. vegna launa fyrir vertíðina. Öll málin voru tekin fyrir af Héraðsdómi Vesturlands 27. og 28. janúar 2025.

Allir starfsmennirnir höfðu samþykkt boð um að starfa við hvalveiðar yfir vertíðina sem átti að hefjast annars vegar 21. janúar og hins vegar 22. janúar. Deilt var um hvort að starfsmennirnir hefðu átt rétt á að fá greidd laun þar sem allt stefndi í að leyfi fengist fyrir veiðunum.

Það var degi áður en til stóð að hefja veiðar sumarið 2023 sem Svandís Svavarsdóttir, þáverandi matvælaráðherra, ákvað að banna hvalveiðar til 1. september. Hvalveiðar hafa lengi verið umdeildar og voru mikið í umræðunni það sumar eftir að eftirlitsskýrsla Matvælastofnunar um velferð hvala barst ráðuneyti hennar. Þar kom fram að aflífun dýranna hefði tekið of langan tíma. 

Tveir fengu uppsagnarfrest

Í fyrsta málinu var talið að ráðningarsamningur hefði komist á en hann hafi ekki getað að fullu komið til framkvæmda þar sem ekki mátti veiða hvali. Hann fékk því rúmar 2,1 milljónir króna greiddar auk málskostnaðar. Dómurinn komst að sömu niðurstöðu í hinu málinu sem ekki var sýknað í. Þar fékk starfsmaðurinn einnig greiddar rúmar 2,1 milljónir króna.

Báðir höfðu þeir starfað áður yfir hvalveiðivertíðina og höfðu samband við forsvarsmenn Hvals hf. þar sem þeir sögðust hafa áhuga á að starfa aftur við hvalveiðar sumarið 2023. Annar þeirra fékk sérstakt leyfi úr aðalstarfi sínu til að vinna við hvalveiðarnar, leigði út íbúðina sína og lagði út fyrir pössun fyrir hundinn sinn. 

Hvalur hf. var sýknaður af kröfum hinna þriggja starfsmannanna. Ekki er tekið fram hvort tveir þeirra hefðu starfað áður hjá fyrirtækinu en sá þriðji hafði áður starfað í fjórar vertíðir hjá fyrirtækinu.