„Ég svaf ekki mikið í nótt“

Hin 19 ára gamla Sonja Lí er ríkjandi Íslandsmeistari í svigi en var ekki á meðal þeirra fjögurra sem héldu út á leikana á dögunum. Íslandi bauðst auka sæti í gærkvöld en Sonja segist hafa verið búin að gefa möguleikann á leikunum upp á bátinn.

„Ég var á varalista og var í rauninni andlega klár fyrir þetta alveg lengi. En á síðustu dögum hef ég hugsað að þetta sé búið og nú er að fara á leikana eftir fjögur ár,“

„Svo í gærkvöld fékk ég símhringingu þegar ég var löggst á koddann og mér voru tillkynnt þessar fréttir. Ég get sagt það að ég svaf ekki mikið í nótt. Það er alveg hægt að segja það,“ segir Sonja og hlær.

En hvernig voru viðbrögðin þegar kallið kom?

„Það fyrsta sem kemur upp er að standa sig. Þetta er stórt augnablik en þetta snýst líka um þessa upplifun og það sem maður fær út úr þessu. Þó það mikilvægasta sé að hafa gaman finnst mér mikilvægt að standa sig. Það er smá pressa en þá er að lækka axlirnar og gera þetta að raunveruleika,“ segur Sonja.

Pabbi fær óvæntan félagsskap

Sonja fetar í fótspor föður síns, Kristins Magnússonar, sem keppti á leikunum í Salt Lake árið 2002. Kristinn heldur út á morgun til að þjálfa Elínu Elmarsdóttur van Pelt sem keppir fyrir Íslands hönd. Hann fær aukinn félagsskap er Sonja heldur út í fyrramálið.

„Hann var alltaf á leiðinni út og var skráður þjálfari fyrir Elínu. Hann vissi ekki að ég væri að ég væri að fara þegar ég fékk símhringinguna. Ég fékk heiðurinn að hringja í pabba og spyrja hvort hann ætti pláss í bílnum á leið í Ólympíuþorpið. Það voru gleðifréttir,“ segir sælbrosandi Sonja sem keppir á leikunum á sunnudaginn kemur og miðvikudaginn eftir það.

Viðtal við Sonju úr Sportpakka gærkvöldsins á Sýn má sjá að ofan.