„Fannst ég mjög ryðgaður ef ég á að vera al­veg hrein­skilinn“

„Mér fannst ég mjög ryðgaður ef ég á að vera alveg hreinskilinn. Það er stutt síðan ég kom heim, þannig vonandi fer þetta bara upp á við,“ sagði Grétar Ari Guðjónsson, markvörður Hauka, eftir sigur liðsins gegn Valsmönnum í kvöld.

Haukar áttu frábæran leik og skoruðu 41 mörk. Grétar Ari virtist ekki vera eins ryðgaður og hann hélt fram en hann átti öflugan leik og varði 8 skot.

„Svona er bara sportið, það er fullt af mjög góðum leikmönnum í þessari deild. Þannig það verður eitthver aðlögunartími. Það er gaman að spila í stemningu og í góðu liði og mjög gott að uppskera sigur í dag á móti sterku liði Valsmanna.“

Með sigrinum í kvöld tylltu Hafnfirðingarnir sér á topp deildarinnar. Grétar segir liðið þurfa að halda haus og spila vel ef þeir ætla að halda áfram að uppskera svona frammistöður eins og í kvöld.

„Það er ekkert hægt að segja út frá einum leik í þessari deild. Öll liðin eru mjög jöfn, liðin með marga flotta leikmenn. Það geta allir unnið alla og við höfum séð það ár eftir ár. Ef við spilum vel þá er allt hægt en ef við missum haus þá erum við fljótir að missa það niður, eins og sást í dag, við missum hausinn í 10 mínútur og töpum mjög hratt með fjórum á þeim kafla. Við tökum bara einn leik í einu og gerum okkar besta.“