Rúss­neskir hakkarar reyndu tölvuárásir á vef­síður Ólympíu­leikanna

Antonio Tajani, utanríkisráðherra Ítalíu, sagði að árásirnar hafi beinst að vefsíðum Vetrarólympíuleikanna og hótelum í Cortina d'Ampezzo, auk nokkurra skrifstofa utanríkisráðuneytis landsins, þar á meðal einnar í Washington, sagði

Í samtali við fréttamenn í ferð til höfuðborgar Bandaríkjanna sagði Tajani að tilraunir til árása væru „af rússneskum uppruna“ en gaf ekki frekari upplýsingar.

„Við komum í veg fyrir röð tölvuárása á vefsíður utanríkisráðuneytisins, þar á meðal í Washington, og einnig á nokkrar síður Vetrarólympíuleikanna, þar á meðal hótel í Cortina,“ sagði Tajani fyrir opnunarhátíðina á föstudag á San Siro-leikvanginum í Mílanó.

Vetrarólympíuleikarnir hófust í gær með fyrstu krullukeppnunum í Cortina.

Innanríkisráðherra Ítalíu, Matteo Piantedosi, sagði á þingi á miðvikudag að sex þúsund öryggisverðir yrðu staðsettir á leikvangasvæðum sem teygja sig frá Mílanó til Dólómítafjalla – þar á meðal sprengjusérfræðingar, leyniskyttur og sérsveitir gegn hryðjuverkum.

Ólympíunefndir Rússlands og Hvíta-Rússlands eru enn í banni fyrir að brjóta gegn ólympíufriðnum vegna innrásar Rússa í Úkraínu árið 2022. 

Eins og á Sumarólympíuleikunum 2024 í París geta einstakir rússneskir og hvítrússneskir íþróttamenn á leikunum 2026 keppt sem „hlutlausir einstaklingsíþróttamenn“ (AIN) án þjóðarauðkenna. Hlutlausir einstaklingsíþróttamenn þurfa að fá samþykki frá alþjóðasérsambandi hverrar íþróttagreinar og síðan frá nefnd á vegum Alþjóðaólympíunefndarinnar.

Rússneskum og hvítrússneskum íþróttamönnum er ekki heimilt að keppa í liðagreinum eins og íshokkíi og krullu, þar sem Alþjóðaólympíunefndin hefur úrskurðað að „hópur hlutlausra einstaklingsíþróttamanna geti ekki talist lið“