Með 29 kíló af maríjúana í töskunum

Mennirnir voru ákærðir fyrir stórfellt fíkniefnabrot en þeir voru báðir með um fjórtán og hálft kíló af efnunum í töskum sínum.

Við þingfestingu játuðu mennirnir brot sín en verjandi annars mannsins óskaði eftir að dómari myndi við ákvörðun refsingar taka tillit til ungs aldurs viðkomandi.

Í dómi segir að af rannsóknargögnum verði ekki séð að mennirnir hafi verið eigendur fíkniefnanna eða að þeir hafi tekið þátt í skipulagningu á innflutningi þeirra til Íslands með öðrum hætti en að samþykkja að flytja efnin til landsins gegn greiðslu.

Dómari í málinu mat hæfilega refsingu yfir mönnunum vera tíu mánaða fangelsi og að til frádráttar kæmi gæsluvarðhald sem þeir höfðu sætt frá komunni til landsins.