Gugga í gúmmí­bát og Pat­rekur Jaime í eina sæng

„Enginn er óhultur“ er yfirskrift þáttanna  og mega hlustendur búast við beittum skoðunum, svörtum húmor, óvæntum umræðuefnum og umræðu þar sem ekkert er sett í bómul, að sögn þáttastjórnenda.

„Jaime og Gúmmí koma til með að auka við fjölbreytnina í dagskrá FM957 þar sem við viljum auðvitað ná til sem flestra og bjóða upp á hágæða afþreyingu. Þau hafa bæði reynslu úr fjölmiðlum og ég get ekki beðið eftir að fyrsti þáttur fari í loftið!“ sagði Egill Ploder dagskrárstjóri FM957.

Patrekur Jaime og Gugga í gúmmíbát hafa bæði slegið í gegn á undanförnum árum.

Gugga í Gúmmíbát vakti fyrst athygli á samfélagsmiðlum áður en hún varð hluti af hlaðvarpsþættinum Veislunni með Gústa B og Sigga Bond. Hún sló rækilega í gegn í annarri seríu af Bannað að hlæja á Sýn og var með djammþætina Gugga fer á djammið á Vísi í vetur.

Patrekur Jaime er landsþekktur eftir að hafa slegið í gegn í sjónvarpsþáttunum Æði og hefur fest sig í sessi sem rödd sem þorir að segja það sem aðrir hugsa.

„Ég er ógeðslega spenntur að byrja í útvarpinu. Mér finnst æði að fá að vera með Guggu í þessu verkefni enda er hún ein af mínu nánustu. Það er einhver sérstök stemning að byrja helgina sína í útvarpi sem ég er svo spenntur að upplifa. Er smá stressaður af því við bæði segjum alveg galna hluti af og til vonandi fer það bara vel í fólkið,“ sagði Patrekur.

Patrekur og Gugga leiða hlustendur í gegnum föstudagseftirmiðdegið með lifandi samtölum, tónlist, gestum, sketsum og óvæntum uppákomum. 

„Þátturinn er ætlaður þeim sem vilja eitthvað aðeins djarfara, ófyrirsjáanlegra og hreinskilnara í íslensku útvarpi,“ segir Egill Ploder um Jaime og Gúmmí.

Vísir er í eigu Sýnar.