„Læt þá stundum heyra það að þeir geti ekki unnið án mín“

„Mjög gott að fá sigur loksins og kannski setja einhverja nokkra sigra saman“ sagði Sigurður Pétursson eftir sigurinn í kvöld.

„Við enduðum síðasta ár á því að tapa sex í röð þannig það er gott að tengja nokkra leiki saman og bara gaman að vinna, leiðinlegt að tapa“

Leikurinn í kvöld var mjög kaflaskiptur en Álftnesingar reyndust sterkari á lokakaflanum.

„Við bara byrjuðum að spila vörn. Þetta var einhvern veginn ekkert flóknara en það og byrjuðum aðeins að hlaupa. Við eigum það til að vera svolítið hægir en um leið og við förum að haupa aðeins á þá að þá áttu þeir bara í erfiðleikum með okkur“

Álftanes eru komnir með smá andrými frá liðunum fyrir neðan sig í baráttunni um sæti í úrslitakeppninni og var þessi sigur því enn mikilvægari fyrir vikið.

„Mjög mikiævægt og ég skoðaði aðeins þessa stigatöflu fyrir leikinn og fékk smá í magann, maður er þarna að berjast á botninum sem er helvíti leiðinlegt en það er gott að fá svona smá andrými frá þeim. Við verðum bara að halda áfram að setja þessa leiki saman og halda áfram að vinna, ekkert að stoppa núna“

Það er skemmtileg staðreynd að Álftanes hefur ekki unnið leik án Sigurðar Péturssonar en er hann límið sem heldur þessu saman?

„Ég ætla ekki að segja það en ég er náttúrulega bara eitt púsl í þessu púsluspili. Ef það vantar eitt púsl þá getur þetta verið svolítið erfitt“

„Þeir settu þetta lið upp með mig í myndinni og það er erfitt sama hvern myndi vanta, ef það myndi vanta David [Okeke] þá myndi vanta stóran mann og ef það vantar mig þá vantar kannski smá orku í liðið“

„Þetta voru líka erfiðir leikir sem að þeir áttu og voru að spila þarna eftir að ég meiddist en ég læt þá stundum heyra það að þeir geti ekki unnið án mín þannig þetta er bara gott að halda þessu áfram“ sagði Sigurður Pétursson.