Býst núna við því versta frá á­horf­endum

Littler var greinilega undrandi á viðtökum áhorfenda í gær og virðist ekki lengur njóta sömu vinsælda í höllinni. Hann segir þó eðlilegt að fólk haldi frekar með þeim sem séu síður sigurstranglegir. Littler er nú í þeirri stöðu að vera sá besti í heimi og líklegur til að verja titilinn eftir að hafa orðið heimsmeistari í byrjun þessa árs, rétt áður en hann varð 18 ára.

Littler hafði verið með mikið látbragð á sviðinu þegar hann náði góðum útskotum í leiknum í gær. „Og hvað?!“ mátti sjá hann kalla til áhorfenda og þegar leiknum lauk fór hann mikinn í viðtali við Sky Sports uppi á sviðinu.

„Mér er alveg sama. Virkilega alveg sama,“ sagði Luke Littler um baulið og sneri sér síðan að áhorfendum:

„Þið borgið fyrir miðana og þið borgið fyrir verðlaunaféð mitt þannig að takk fyrir að púa á mig.“

Littler hafði róast þegar hann mætti svo á blaðamannafund eftir leikinn en þar var hann meðal annars spurður, í ljósi þess hve ótrúlega vel hann spilaði og það undir stöðugu bauli, hvað þyrfti eiginlega til þess að hann missti stjórn á sér á sviðinu:

„Ég missti hana. Ég held að hún sé enn uppi á sviðinu,“ sagði Littler léttur í bragði. En hann var ánægður með hvernig hann tókst á við aðstæðurnar:

„Fyrir tveimur árum held ég hreinlega að ég hefði byrjað að kasta líkt og með vinstri hönd. Svona hef ég nú þroskast mikið. Fólk gæti sagt að ég sé ekki þroskaður en reynið að setja ykkur í mín spor,“ sagði Littler.

Hann á fyrir höndum leik við Luke Woodhouse eða Krysztof Ratajski í átta manna úrslitunum, á nýársdag, og gæti svo mögulega mætt Ryan Searle eða Jonny Clayton í undanúrslitum. Það er ekki fyrr en í úrslitum sem Littler gæti mögulega mætt nafna sínum Luke Humphries.

Það verður svo að koma í ljós hver viðbrögð áhorfenda verða næst þegar Littler mætir á sviðið en þrátt fyrir ungan aldur er hann orðinn ýmsu vanur:

„Ég býst við hinu versta á nýársdag, sama hverjum ég mæti. Það verður bara að koma í ljós hvað gerist. Ég verð tilbúinn,“ sagði Littler.

HM í pílukasti heldur áfram í dag með beinum útsendingum á Sýn Sport Viaplay klukkan 12:30 og 19.