Van Gerwen: „Al­veg sama um Luke og Luke“

Margir búast við því að nafnarnir mætist í úrslitum heimsmeistaramótsins í pílukasti 3. janúar næstkomandi. Van Gerwen getur hins vegar sett strik í þann reikning en hann gæti mætt Humphries í undanúrslitum og Littler í úrslitum.

„Mér er alveg sama um Luke og Luke núna. Ég þarf bara að einbeita mér að minni eigin frammistöðu. Ég get hvort eð er ekki mætt þeim fyrr en í undanúrslitunum eða úrslitunum,“ sagði Van Gerwen.

Hollendingurinn stígur á stokk í kvöld og mætir Þjóðverjanum Arno Merk í 3. umferð heimsmeistaramótsins.

Merk kom gríðarlega á óvart með því að sigra fyrrverandi heimsmeistarann Peter Wright í 2. umferð HM, 3-1, en sá þýski er á sínu fyrsta heimsmeistaramóti. Eftir leikinn sendi Van Gerwen Wright væna pillu.

„Það kom mér alls ekki á óvart að hann hafi fallið úr keppni. Hann hefur spilað hörmulega undanfarið og ég held það sé kominn tími á að hann hætti,“ sagði van Gerwen um Wright.

Van Gerwen sigraði Japanann Mitsuhiko Tatsunami í 1. umferð HM, 3-0, og hafði svo betur gegn Íranum William O'Connor í 2. umferðinni, 3-1. Þar var Van Gerwen með 100,20 í meðaltal.

Sýnt verður beint frá heimsmeistaramótinu í pílukasti á Sýn Sport Viaplay í dag. Fyrri hlutinn hefst klukkan 12:25 og sá síðari klukkan 18:55.