Hóta því að skrópa á Ólympíu­leikana

Þetta þýðir að nú hóta stærstu stjörnur íþróttarinnar því að skrópa á leikana.

NHL-leikmenn munu ekki taka þátt í Vetrarólympíuleikunum á Ítalíu árið 2026 ef gæði íssins eru ekki nægilega góð, en þetta segir Bill Daly, aðstoðarframkvæmdastjóri deildarinnar.

Hann er þó „varlega bjartsýnn“ á að málin verði leyst í tæka tíð.

Stjörnur úr NHL-íshokkídeildinni, þeirri stærstu í heimi, eiga að keppa á Ólympíuleikunum í Mílanó-Cortina á næsta ári en það yrði í fyrsta sinn sem þeir keppa á Vetrarólympíuleikum síðan árið 2014.

Hins vegar eru efasemdir um stærð og gæði íssins í Santagiulia-leikvanginum í Mílanó, þar sem framkvæmdum er enn ekki lokið þrátt fyrir að leikarnir hefjist 6. febrúar. Leikir verða einnig haldnir í Milano Rho-leikvanginum.

„Ef ísinn er óleikhæfur, þá er ísinn óleikhæfur,“ sagði Daly.

„Ég vil ekki gera lítið úr þessu. Við munum líklega vita það áður en leikarnir hefjast formlega. Hvað gert er á þeim tímapunkti verður annað mál. Augljóslega, ef leikmönnum finnst ísinn vera óöruggur, þá munum við ekki spila. Það er ekki flóknara en það,“ sagði Daly.

Íshokkívöllurinn í Mílanó, sem Alþjóðaíshokkísambandið hefur samþykkt, er styttri en lágmarkskröfur NHL, sem hefur leitt til vangaveltna um að árekstrum á miklum hraða gæti fjölgað.

Leikmannasamtök NHL sögðu á laugardag að áhyggjurnar sneru meira að gæðum íssins en stærðinni.

Daly sagði þó að hann teldi ekki að vandamálin væru óyfirstíganleg.

„Við höfum boðið fram aðstoð og þeir eru að nýta sér sérfræðinga okkar, tæknimenn og utanaðkomandi þjónustuaðila,“ sagði Daly.

„Við erum í raun að flytja alla þangað til að hjálpa til við að klára þetta á þann hátt sem er ásættanlegur fyrir NHL-íþróttamenn. Og ég er varlega bjartsýnn á að það muni bera ávöxt,“ sagði Daly.