Úr­slitin í beinni í kvöld: „Ég er vanari fyrir framan mynda­vélarnar“

Úrslitaeinvígi Halla og Alexanders Veigars Þorvaldssonar verður í beinni útsendingu á Sýn Sport Ísland klukkan 20 í kvöld. 

Félagarnir vörðu stórum hluta gærdagsins saman en Halli segist ekki hafa nýtt þann tíma í neinn sálfræðihernað, enda sé það tilgangslaust gegn Alexander. 

„Nei, það er algjör óþarfi. Hann er pollrólegur og það sést ekkert á honum. Maður þarf bara að mæta. Sálfræðihernaðurinn snýst bara um að „taka út“ á undan,“ segir Halli.

Viðtalið við Halla má sjá hér að neðan.

Eins og fyrr segir má fastlega búast við fullum sal af fólki á Bullseye og mikilli stemningu nú þegar úrslitin ráðast, eftir skemmtileg keppniskvöld síðustu helgar. Halli nýtur sín í slíkri stemningu:

„Ég spilaði í Frankfurt fyrir framan 7.000 manns í salnum og það var sturlað. Æðislega gaman. Ég ætlaði að hætta eftir það ár en þegar ég fann þessa tilfinningu þá hugsaði ég: Nei, ég vil meira.“

„Veit að ég get gert betur“

„Ég spennist upp þegar ég mæti á svæðið og byrja að æfa mig en svo er ég búinn að ná mér niður áður en ég fer upp að línu.

Ég þarf bara að spila eins og ég veit að ég get. Ég setti met hérna fyrsta sjónvarpskvöldið. Ég hef ekki verið að spila eins vel og ég hefði viljað en ég veit að ég get gert betur á morgun,“ segir Halli og telur sig eiga meira inni en hann hefur sýnt:

„Miklu, miklu meira. Ég spái því að annar okkar muni eiga níu pílna séns. Ég tek það stórt upp í mig,“ segir Halli en það telst fullkomin frammistaða í pílukasti þegar menn þurfa aðeins níu pílur til að klára 501 og vinna einn legg.

„Rennur varla í honum blóðið“

Halli veit vel að hann fær góða mótspyrnu í kvöld:

„Alexander er bara svakalegur skorari. Flottur í útskotunum, og hann er pollrólegur á sviði. Það rennur varla í honum blóðið. Hann er frábær íþróttamaður,“ segir Halli en vonar að það hjálpi sér að hafa unnið mótið fyrir tveimur árum. Þeir Vitor Charrua eru einu mennirnir sem hafa unnið mótið en það gerði Vitor 2022 og 2024, og Halli 2023.

„Ég er vanari fyrir framan myndavélarnar. Hef unnið fleiri mót fyrir framan myndavélarnar en hann er farinn að vinna núna og tók sinn fyrsta stóra sjónvarpstitil á Sjally Pally á Akureyri, og ég var búinn að spá því að þegar hann tæki þann fyrsta þá myndi hann ekki hætta.“

Úrslitaeinvígið í Úrvalsdeildinni í pílukasti hefst klukkan 20 á Sýn Sport Ísland, í beinni útsendingu frá Bullseye.