Kostnaður við tónleika útskýri hátt miðaverð

Kolbeinn Tumi Daðason skrifar 5. desember 2025 15:22

Tónleikar Bubba Morthens verða 5. og 6. júní næsta sumar. Vísir

Ísleifur Þórhallsson hjá Senu segir gríðarlega dýrt að halda tónleika hér á landi sem útskýri miðverð að stórum hluta. Nokkur umræða hefur skapast um stórtónleika Bubba Morthens sem haldnir verða í Laugardalshöll í sumar og þykir sumum miðinn nokkuð dýr. Ódýrasti miðinn á tónleikana kostar 15 þúsund krónur en sá dýrasti 40 þúsund krónur.

Ísleifur, sem kemur ekkert nálægt tónleikum Bubba, er einn reyndasti tónleikahaldari landsins og hann var kallaður til í Bítinu á Bylgjunni í morgun til að ræða þessi mál og hann bendir á að verðlag á Íslandi sé almennt mjög hátt.

„Á þessum tónleikum Bubba þá er bilið mjög breitt. Við höfum verið að gera það og allir tónleikahaldarar að bjóða upp á mjög breitt bil. Það má hafa það í huga að þetta er í gömlu höllinni svo ég reikna með að það séu standandi á gólfinu og sitjandi í stúkunni. Þetta eru hátt í fimm þúsund miðar og þar af eru bara í boði um 1600-1700 sæti. Þannig að þetta er mjög takmörkuð auðlind, ofsalega fá sæti í boði og við erum að tala um tónleika þar sem öll sætin eru seld,“ segir Ísleifur Þórhallsson hjá Senu.

Raunar seldist upp á tónleikana á augabragði svo ákveðið var að halda tvenna tónleika. Þá tekur Ísleifur fram að framboð á tónleikum erlendra listamanna hafi minnkað gríðarlega eftir Covid-faraldurinn.

„Ég var að hugsa til baka eftir Covid, hvað við höfum farið oft í stórtónleika og inn í Höllina. Það eru eiginlega bara tvennir tónleikar. Það eru Backstreet boys og Smashing Pumpkins. Það er af sem áður var. Það er af því að kostnaður hefur hækkað svo svakalega.“

Tónleikar á Íslandi Reykjavík Tónlist Neytendur Bítið