Rúmur milljarður til Við­skipta­ráðs og SA á fimm árum

Þetta segir í svari Daða Más Kristóferssonar, fjármála- og efnahagsráðherra, við fyrirspurn Kristjáns Þórðar Snæbjarnarsonar, þingmanns Samfylkingarinnar.

Hann lagði eftirfarandi spurningar fyrir ráðherra, sem óskaði í framhaldinu eftir svörum frá ríkisfyrirtækjum:

1. Hvaða fyrirtæki sem ríkið er með ráðandi eignarhlut í hafa átt aðild að Viðskiptaráði Íslands á árunum 2015–2025? Svar óskast sundurliðað eftir árum og heiti fyrirtækis.

2. Hvað hafa fyrirtækin greitt í árgjöld og félagsgjöld til Viðskiptaráðs Íslands og fyrir aðild að Samtökum atvinnulífsins og aðildarsamtökum þeirra á tímabilinu 2015–2025, sundurliðað eftir árum?

3. Hver framangreindra fyrirtækja eiga aðild að Samtökum atvinnulífsins og aðildarsamtökum þeirra á árunum 2015–2025? Svar óskast sundurliðað eftir árum og heiti fyrirtækis.

4. Eru einhver framangreindra fyrirtækja með bindandi samninga um aðild að Viðskiptaráði Íslands eða eiga aðild að Samtökum atvinnulífsins og aðildarsamtökum þeirra næstu ár? Ef svo er, hvaða fyrirtæki eru það, hversu lengi eru þau skuldbundin aðildinni og hvað kostar hún?

Sjö ríkisfyrirtæki í Viðskiptaráði

Í svari Daða Más segir að Betri samgöngur, Farice, Harpa, Isavia, Íslandspóstur, Landsbankinn, Landsnet, Landsvirkjun, Matís, Neyðarlínan, Orkubúið og RARIK séðu aðilar að SA og/eða aðildarsamtökum þeirra. Aðildarsamtökin eru Samtök iðnaðarins, Samtök verslunar og þjónustu, Samorka, Samtök ferðaþjónustunnar og Samtök fyrirtækja í fjármálaþjónustu.

Enn fremur séu Betri samgöngur, Farice, Íslandspóstur, Landsbankinn, Landsnet, Landsvirkjun og RARIK félagar í Viðskiptaráði Íslands.

1,3 milljarðar króna síðustu tæp fimm ár

Sem áður segir hafa ríkisfyrirtæki greitt SA og VRÍ 245 milljónir króna í ár og 244 milljónir króna í fyrra. Árið 2023 nam upphæðin um 240 milljónum króna, árið 2022 195 milljónum og árið 2021 176 milljónum. 

Þannig hafa ríkisfyrirtæki greitt SA og VRÍ um 1,1 milljarða króna á fimm árum.

Leiðrétting: Villa læddist með í svar ráðuneytisins, þar sem segir að Landsbankinn hafi greitt SA 220.385.000 krónur í fyrra. Að sögn Rúnars Pálmasonar, upplýsingafulltrúa Landsbankans, nam upphæðin 20.384.803 krónum.