Fannst serbneski línu­maðurinn leiðin­leg og al­gjör tuddi

„Það er ótrúlega, ótrúlega, ótrúlega sárt,“ sagði Elísa í samtali við Ágúst Orra Arnarson, aðspurð hvernig væri að heyra sigursöngva serbnesku leikmannanna óma eftir leikinn.

„Ég get eiginlega ekki lýst því. Ég er mjög pirruð. En ég er ógeðslega ánægð með árangurinn okkar í seinni hálfleiknum og stolt af okkur. Við vorum svo nálægt því.“

Elísa barðist við hina stóru og öflugu Cvijic í leiknum í kvöld.

„Það var ógeðslega leiðinlegt að eiga við hana. Hún er grófur leikmaður, notar olnbogann, er að fiska og fagnar í andlitið á manni. Maður verður trítilóður á henni. En það var bara gaman að fá nýja áskorun,“ sagði Elísa.

„Þetta er bara reynsla í henni. Hún hefur örugglega fimmtán ár á mig þannig ég verð vonandi orðin svona mikill tuddi þegar ég verð kominn á þennan aldur.“

Íslendingar lentu mest sjö mörkum undir, 24-17, en með Hafdísi Renötudóttur í miklum ham í markinu komu íslensku stelpurnar til baka og voru hársbreidd frá því að ná í stig.

„Ég get varla komið því í orð hvað ég er stolt af liðinu. Fyrsta sem ég hugsaði var: Þetta er bara rétt að byrja. Ímyndið ykkur hvað við getum orðið góðar eftir nokkur ár ef við höldum í þennan hóp,“ sagði Elísa.

„Þessi hópur er búinn að æfa lengi saman og við erum að ná þessum árangri á móti gífurlega sterku liði. Ég er spennt fyrir komandi tímum og full af stolti.“

Elísa hefur glímt við axlarmeiðsli en segir þau heyra sögunni til.

„Ég hef aldrei verið betri,“ sagði Eyjakonan ákveðin að endingu.

Viðtalið við Elísu má sjá í spilaranum hér fyrir ofan.