Allur til­finninga­skalinn á Ung­frú Ís­land Teen

Alls stigu þrjátíu stúlkur á svið og tókust á um titilinn eftirsótta þar sem þær létu ljós sitt skína klæddar glitrandi síðkjólum og hælaskóm. Gleðin skein úr andlitum stúlknanna sem voru hver annarri glæsilegri.

Þetta er í fyrsta sinn sem fegurðarsamkeppnin Ungfrú Ísland Teen var haldin, en slíkar fegurðarsamkeppnir fyrir ungar stúlkur hafa ekki verið haldnar hérlendis áður. Keppnin er í ætt við hina hefðbundnu Ungfrú Ísland nema hvað það er ekkert sundfataatriði sökum aldurs keppanda.

Dómnefndin í ár var skipuð fimm einstaklingum sem hver og einn hefur ástríðu fyrir sköpun, fagurfræði og sjálfstyrkingu ungra kvenna: Manuela Ósk Harðardóttir, eigandi Ungfrú Ísland og fyrrum Ungfrú Ísland; Lilja Sif Pétursdóttir, Ungfrú Ísland 2023 og Miss Supranational Europe 2025; Kristinn Óli Hrólfsson, fræðslu- og markaðsstjóri og hárgreiðslumeistari; Lína Birgitta Sigurðardóttir, athafnakona og áhrifavaldur; og Steinunn Margrét Gunnbjörnsdóttir, sérfræðingur í varanlegri förðun.

Kynnir kvölsdins var Elísa Gróa Steinþórsdóttir Ungfrú Ísland 2021, og aðstoðarframkvæmdastjóri keppninnar, og sá Helena O’Connor, Ungfrú Ísland 2025, um að krýna fyrstu Ungfrú Ísland Teen.

Ljósmyndarinn Arnór Traustason fylgdi stúlkunum með myndavélinni baksviðs, allt þar til stóra stundin rann upp.