Jimmy Kimmel snýr aftur á skjáinn

Þátturinn var tekinn af skjánum í kjölfar þrýstings frá bandarískum yfirvöldum og reyndist ákvörðunin mjög umdeild. Lýstu gagnrýnendur yfir áhyggjum af því að aðgerðin kæmi til með að grafa undan málfrelsi í Bandaríkjunum. 

Þættirnir eru framleiddir af og sýndir á ABC-sjónvarpsstöðinni bandarísku sem er í eigu The Walt Disney Company. Disney hefur gefið út að Kimmel muni snúa aftur á þriðjudag en hafði áður gefið út að hlé yrði gert á þáttunum um óákveðinn tíma. 

„Síðastliðinn miðvikudag tókum við ákvörðun um að stöðva framleiðslu þáttanna til að forðast að kynda undir spennu á tilfinningaþrungnum tíma í landinu okkar,“ segir í yfirlýsingu Walt Disney Company. „Þetta er ákvörðun sem við tókum vegna þess að okkur fannst sumar athugasemdirnar vera ótímabærar og þar af leiðandi ónærgætnar. Við höfum nýtt síðustu daga til að eiga í ígrunduðum samræðum við Jimmy og eftir þessi samtöl komumst við að þeirri niðurstöðu að þátturinn myndi snúa aftur á þriðjudag.“ The Hollywood Reporter greinir frá þessu. 

Fréttin er í vinnslu og verður uppfærð.