Óásættan­legt að al­mennir starfs­menn séu beittir óeðli­legum þrýstingi

Verkalýðsfélögin tvö segja að þeim hafi borist „vísbendingar um að félagsfólki okkar hafi verið beitt óeðlilegum þrýstingi á vinnustaðnum.“ Það sé óásættanlegt að venjulegt starfsfólk upplifi þrýsting eða afskipti sem geti haft áhrif á skoðun þeirra á deilunni.

Greint er frá þessu í tilkynningu frá Afli starfsgreinafélagi og Rafiðnaðarsambandi Íslands.

„Við krefjumst þess að þessum afskiptum verði hætt strax og að stjórnendur einbeiti sér frekar að því að koma að samningaborðinu með tilboð sem felur í sér sömu launahækkanir og tryggðar hafa verið í öðrum stóriðjum á Íslandi á næstu árum.“

Kjaraviðræður Alcoa Fjarðaáls á Reyðarfirði við Afl starfsgreinafélag og Rafiðnaðarsamband Íslands hafa staðið yfir frá því í desember án árangurs. Hafa um 400 starfsmenn álversins verið án starfssamnings síðan í febrúar.

Undirbúningur atkvæðagreiðslu um verkfall stendur nú yfir og á Hjördís Þóra Sigurþórsdóttir, formaður Afls, von á því að niðurstaða liggi fyrir innan tveggja vikna. Hún sagði í samtali við fréttastofu í gær að enn væri nokkuð langt á milli aðila. 

Fréttastofa hefur óskað eftir viðbrögðum frá Alcoa Fjarðaáli og verður fréttin uppfærð ef þau berast.