Enski boltinn

Glugganum lokað: Enn ó­víst hvort stærstu skiptin hafi gengið í gegn

Íþróttadeild Sýnar skrifar
Alexander Isak verður í dag dýrasti leikmaður í sögu enska boltans ef að líkum lætur.
Alexander Isak verður í dag dýrasti leikmaður í sögu enska boltans ef að líkum lætur. Getty/Charlotte Wilson

Sjaldan verið eins margt spennandi í gangi á lokadegi félagaskiptagluggans á Englandi. Enn er óvíst hvort stærstu skiptin hafi gengið í gegn en glugganum hefur verið lokað.

Liverpool er að landa Alexander Isak frá Newcastle sem þar með verður dýrasti leikmaður í sögu enska boltans. Það á þó enn eftir að tilkynna þau vistaskipti. Hvað Marc Guéhi varðar þá er að sama skapi óvíst hvort miðvörðurinn verði leikmaður Englandsmeistaranna eða verði áfram hjá Crystal Palace. 

Manchester City á eftir að staðfesta kaupin á markverðinum Gianluigi Donnarumma og er talið næsta öruggt að það gerist hvað á hverju. Hann er þó sem stendur enn leikmaður Evrópumeistara París Saint-Germain. 

Franska stórliðið hefur hins vegar selt miðjumanninn Carlos Soler til Real Sociedad. Skrifar hann undir samning til ársins 2029. Landsliðsfyrirliðinn Orri Steinn Óskarsson leiðir línuna hjá Sociedad.

Það hefur þó fjöldinn allur af félagaskiptum átt sér stað í dag. Það var nóg að gera á skrifstofu Manchester United. Markvörðurinn Senne Lammens er mættur til að leysa markmannsvandræði félagsins. Um er að ræða 23 ára gamlan Belga sem hefur aðeins spilað í heimalandinu til þessa.

Danski framherjinn Rasmus Höjlund er farinn á láni til Ítalíumeistara Napoli. Hann á að fylla skarð Romelu Lukaku sem er að glíma við meiðsli. Real Betis hefur þá fest kaup Antony.

Brasilíski vængmaðurinn stóð sig frábærlega á láni hjá félaginu á síðustu leiktíð en um tíma virtist sem vistaskiptin myndu ekki ganga upp. Á endanum náðist að semja um kaup og kjör. Martraðardvöl Antony í Manchester er því lokið.

Ungi bakvörðurinn Harry Amass hefur þá gengið í raðir B-deildarliðsins Sheffield Wednesday á láni.

Victor Lindelöf, fyrrverandi miðvörður Man United, samdi í dag við Aston Villa. Fyrrverandi samherji hans, Jadon Sancho, er svo á leið til Villa á láni. Sömu sögu er að segja af Harvey Elliott, leikmanni Liverpool.

Önnur félagaskipti

  • Fulham seldi Martial Godo til Strasbourg og keypti Kevin frá Shakhtar Donetsk, vængmann frá Brasilíu, fyrir 5,8 milljarða íslenskra króna. Samuel Chukwueze er svo að koma á láni frá AC Milan. 

    Úlfarnir keyptu Tolu Arokodare frá Genk í Belgíu fyrir nærri fjóra milljarða íslenskra króna.
  • Brighton & Hove Albion lánaði Facundo Buonanotte til Chelsea og Jeremy Sarmiento til Cremonese.
  • Ben Chilwell hefur loks yfirgefið Chelsea. Hann gengur til liðs við Strasbourg sem er undir sama eignarhaldi og Chelsea. Raheem Sterling og Axel Disasi eru hins vegar enn leikmenn Chelsea eftir að hafa verið orðaðir frá félaginu í allt sumar. 
  • Bournemouth hefur fengið Álex Jiménez á láni frá AC Milan. Táningurinn Veljko Milosavljević var svo keyptur frá Rauðu stjörnunni.
  • Sambi Lokonga hefur yfirgefið Arsenal. Hann samdi við Hamburg sem leikur í efstu deild Þýskalands.
  • Darko Churlinov er genginn í raðir Burnley líkt og Florentino Luis.
  • Hinn franski Odsonne Edouard hefur yfirgefið Crystal Palace fyrir Lens í heimalandinu. Miðvörðurinn Jaydee Canvot er genginn í raðir félagsins frá Toulouse í Frakklandi.

Hér að neðan má sjá beina textalýsingu Vísis frá því helsta sem gerðist í dag.




Fleiri fréttir

Sjá meira
×