Kane og Diaz tryggðu Bayern Ofurbikarinn

Þýskalandsmeistarar Bayern heimsóttu þýsku bikarmeistarana í Stuttgart í þýska Ofurbikarnum í kvöld.

Harry Kane kom Bayern München yfir með marki á 18. mínútu leiksins, en það reyndist eina mark fyrri hálfleiks og staðan því 1-0, Bayern í vil, þegar liðin gengu til búningsherbergja.

Það var svo Luis Diaz, sem er nýgenginn í raðir Bayern frá Liverpool, sem tvöfaldaði forystu liðsins eftir undirbúning frá Serge Gnabry á 77. mínútu.

Jamie Leweling klóraði í bakkann fyrir Stuttgart á þriðju mínútu uppbótartíma, en þá var það orðið of seint og liðsmenn Bayern fögnuðu þýska Ofurbikarnum.