Ungur leikskóla­starfs­maður grunaður um kyn­ferðis­brot gegn barni

Samkvæmt heimildum fréttastofu er hinn grunaði leikskólastarfsmaður á leikskólanum Múlaborg í Ármúla og barnið sem hann er grunaður um að hafa brotið á á leikskólaaldri. Fréttastofa hefur ekki upplýsingar um hvort barnið sem karlmaðurinn er grunaður um að hafa brotið á hafi verið í umönnun starfsmannsins.

Lögreglan á höfuðborgarsvæðinu krafðist gæsluvarðhalds yfir karlmanninum samkvæmt heimildum fréttastofu sem hann sætir. Þá mun lögregla hafa tekið skýrslu af nokkrum börnum í tengslum við málið en skýrslutökur yfir börnum fara yfirleitt fram í Barnahúsi.

Lögregla taldi ekki tímabært að tjá sig um málið í gær vegna þess á hvaða stigi rannsókn þess væri en hefur boðað að send verði út fréttatilkynning í dag.

Í tilkynningu frá lögreglu í kjölfar fréttar Vísis kemur fram að tilkynnt hafi verið um málið á þriðjudaginn og maðurinn hafi verið handtekinn í kjölfarið. Karlmaðurinn hafi á miðvikudag verið úrskurðaður í vikulangt gæsluvarðhald.

Fréttin hefur verið uppfærð með nafni leikskólans.