Enn má búast við gosmóðu þó eld­gosinu sé lokið í bili

Veðurstofa Íslands skrifar þetta í tilkynningu til fjölmiðla en gosið hófst 16. júlí á Sundhnúksgígaröðinni.  Engin virkni er lengur í gígunum og nýtt hættumatskort endurspeglar þessa breytingu, segir í tilkynningunni. Gosórói og strókavirkni féllu allverulega niður um helgina og gasmengunar og gosmóðu hefur lítið orðið vart undanfarna daga.

Þrátt fyrir að gosið sé yfirstaðið eru enn lífshættulegar aðstæður á svæðinu vegna nýs og óstöðugs hrauns og mögulegrar gasmengunar. Engin virkni er í gígunum samkvæmt drónamynd frá lögreglunni, segir í tilkynningunni.

Bent er á að lífshættulegt sé að ganga á nýstorknuðu hrauni þar sem yfirborð skorpu getur brostið án fyrirvara og glóandi hraun leynst beint undir. Hætta sé við hraunjaðra þar sem þunnfljótandi hrauntungur geta skyndilega runnið fram. Einnig getur hraunjaðarinn hrunið fram.  Gasmengun geti áfram farið yfir hættumörk í nágrenni við eldstöðina.

Nýtt hættumatskort hefur verið gefið út og mun gilda næstu viku.

Í gær, mánudag, féll virkni í gígnum alveg niður samhliða minnkandi gosóróa. Örlítil virkni var sjáanleg í nótt en í dag hefur engin virkni verið í gígnum og gosið talið yfirstaðið.

Landris hefur hafist á ný samkvæmt gervihnattagögnum og GNSS-mælum og nemur það hátt í þremur sentímetrum. Því er ljóst, að mati stofnunarinnar, að kvikustreymi undir Svartsengi sé enn til staðar og ef landris heldur áfram getur það leitt til frekari kvikuhlaupa og eldgosa.

Verðurstofa segir að engar stórvægilegar breytingar hafi orðið á útbreiðslu hraunbreiðunnar síðustu daga en hún sé enn óstöðug sem getur leitt til framhlaups við hraunjaðra. Þá getur yfirborð jaðarsins brostið án fyrirvara og glóandi hrauntunga runnið fram. Slík framhlaup eru lífshættuleg og mikilvægt er að halda sig fjarri jaðrinum. Þessi hætta er enn til staðar þó að eldgosinu sé lokið.

Gasmengun frá eldgosinu hefur mælst lítil á svæðinu undanfarna tvo daga og gosmóðu hefur ekki orðið vart. Þótt ekki sé lengur virkni í gígnum er áfram möguleiki á að gosmóðu geti orðið vart, jafnvel í einhverja daga eftir goslok.