Þetta er fólkið á bak við Skjöld Ís­lands

Hópurinn var stofnaður 18. júlí síðastliðinn og myndir sem hópsmeðlimir birtu af eins konar „foreldrarölti“ hópsins um miðborgina síðastliðið föstudagskvöld hafa farið eins og eldur í sinu á íslenskum kimum samfélagsmiðlanna. Stjórnendur hópsins segjast standa vörð um Ísland, menningu þess og siði, en bent hefur verið á að merki hópsins, járnkrossinn, prýddi einnig stríðsmenn nasista og forsíðu stefnuyfirlýsingar Anders Behrings Breivik.

Áhrifamenn nýrrar grasrótastjórnmálahreyfingar

Stofnandi hópsins er Sigurrós Yrja Jónsdóttir en aðrir sem gengu fyrstir í hópinn og eru jafnframt stjórnendur innan hópsins eru þeir Gylfi Jónsson maki Sigurrósar Yrju, Sindri Daði Rafnsson og Sveinn Hjörtur Guðfinnsson. Á meðal virkra inni á hópnum eru einnig þeir Daníel Freyr Sævarsson og Sigfús Aðalsteinsson en sá síðarnefndi vakti mikla athygli fyrir að setja á stofn hópinn Ísland - þvert á flokka og standa fyrir röð mótmælafunda á Austurvelli þar sem stefnu stjórnvalda í innflytjenda- og hælisleitendamálum var andmælt.

Allt er þetta fólk sem hyggst bjarga Íslandi frá meintu yfirvofandi siðrofi sem stafi af innflytjendum og hælisleitendum og þá helst af miðausturlensku bergi brotnu. Baráttukonur fyrir réttindum minnihlutahópa hafa þó sagst frekar óttast öryggi sitt í miðbæ Reykjavíkur vitandi af dæmdum ofbeldismönnum á vappi um göturnar.

Lítið er vitað um meðlimi hópsins og enginn forsvarsmanna hans hefur orðið við viðtalsbeiðnum fréttastofu. Þó eru nokkrir virkir meðlimir þar sem hafa fengið þunga dóma meðal annars fyrir að hafa slegið mann í höfuðið með hafnaboltakylfu á meðan félagi hans klippti af honum litla fingur með greinaklippum.

Dómar fyrir bankarán og grófar líkamsárásir

Sindri Rafn Daðason er stjórnandi innan hópsins og hefur áður látið að sér kveða í stjórnmálaumræðunni. Hann var á framboðslista Hægri-grænna í Suðvesturkjördæmi árið 2013. Hann var til viðtals á Vísi á tímanum og þar er fjallað um vopnað bankarán sem hann framdi í Danmörku árið 1999 og hlaut sex ára fangelsisdóm fyrir. Í viðtalinu segist hann hafa átt erfitt með að fóta sig í skóla og leiðst ungur inn á ranga braut.

Hann var byrjaður í neyslu fjórtán ára gamall og var 19 ára gamall kominn í mikil tengsl við undirheima Danmerkur. Það varð að endingu til þess að hann samþykkti að aðstoða tvo menn við að ræna banka í litlum bæ í Danmörku, vopnaður afsagaðri haglabyssu. Hann komst svo aftur á beinu brautina, að hans sögn, lærði bakarann og settist að á Suðurlandi.

Sjá einnig: Klippti fingur af með garðklippum

Annar virkur meðlimur hópsins sem tók einnig þátt í kvöldgöngu Skjaldarins er Kristján Halldór Jensen. Árið 2007 var hann dæmdur í tveggja ára fangelsi fyrir hrottafengnar líkamsárásir. Hann ásamt félaga sínum, Steindóri Hreini Veigarssyni, réðust á mann á Akureyri. Kristján Halldór sló hann með hafnaboltakylfuí höfuðið og lét síðan spörkin dynja á honum. Steindór Hreinn fyrrnefndur klippti síðan litla fingur vinstri handar mannsins af við miðkjúku með greinaklippum.

Í stjórnendaflokki hópsins er jafnframt Sveinn Hjörtur Guðfinnsson en hann hefur haft viðkomu víða í samfélaginu. Hann vann til margra ára sem dyravörður í miðbæ Reykjavíkur og var formaður Framsóknarfélags Reykjavíkur. Hann sagði sig úr Framsóknarflokknum árið 2017. Í Alþingiskosningunum árið 2024 var hann svo kosningastjóri Lýðræðisflokksins.

Frábiðja sér tal um nýnasisma og viðtal

Eins og fyrr segir frábiðja sér meðlimir Skjaldar Íslands allar viðtalsbeiðnir en Sindri Daði birti á hópnum yfirlýsingu til fjölmiðla þar sem eftirfarandi kemur fram:

„Allt tal um rasista, nasista, þjóðernissinna og tengingu á merki okkar, letur og nafn hópsins er kjánaleg tilraun til að rakka okkur niður.“

Af þessu er ljóst að aðstandendur hópsins voru meðvitaðir um nýnasískar skírskotanir merkja sinna enda var þetta áður en nokkur miðill gerði þau að umfjöllunarefni sínu. Borið hefur á því að merki samtakanna, járnkrossinn sem hefur verið tákn nasista og nýnasista í fleiri áratugi, sé sagt vera kristið tákn. Rétt er að svokallaður croix pattée hafi verið notaður í kristnu samhengi í gegnum söguna. Merkið var til dæmis notað af Musterisriddörum og hugrenningartengsl eru á milli þess og krossferða miðalda.

Til að mynda nota bræður Jakobsreglunnar útgáfu af honum. Hins vegar hefur sú útgáfa af þessum svokallaða fætta krossi frá upphafi verið tengdur við nasismann. Í dag er hann nánast einvörðungu, utan þýska hersins, notaður af nýnasistum og er skilgreint sem haturstákn af mörgum mannréttindasamtökum. Til að mynda prýðir það forsíðu stefnuyfirlýsingar Anders Behring Breivik, hryðjuverkamannsins og nýnasistans sem myrti 77 manns í Ósló og Útey og særði aðra 319 akkúrat á þessum degi fyrir fjórtán árum síðan.