Mennirnir þrír sjáist ekki í mynd­efni

„Við erum búnir að fá meira að segja meira myndefni til að vinna með, en það hefur ekki borið neinn árangur. Við höfum ekki fengið nein svör við þessu,“ segir Guðmundur Ásgeirsson, rannsóknarlögreglumaður í samtali við fréttastofu.

Sjá nánar: Grunaðir um að stinga mann í rassinn að til­efnis­lausu

Á myndefninu sést hvernig sá sem var stunginn gengur heim til sín, en enginn sést koma á eftir honum. Guðmundur segir þó ekki hægt að útiloka að einhver hafi komið á eftir honum og ekki sést í mynd.

„Þetta er enn í rannsókn, en ég veit ekki hversu mikið lengur því það er ekkert til að festa hendi á.“

Hann segir lögreglu ekki hafa hugmynd um hverjir þessir meintu þrír sakborningar séu.

Kristján Haukur Magnússon, maðurinn sem var stunginn, steig fram og lýsti atvikunum eins og þau blöstu við honum í samtali við Vísi fyrr í vikunni.

Hann sagðist hafa heyrt mennina tala saman á arabísku og hann ákveðið að heilsa þeim á málinu. Þá hafi hann heyrt mennina tala um að þeir ætluðu að ráðast á hann. Því hafi hann drifið sig á brott en þeir elt hann. Honum hafi tekist að læsa að sér á heimili sínu, en fundið fyrir poti í rassinn.

Hann hafi síðan látið eins og ekkert hefði í skorist, en síðan tekið eftir áverkanum og hringt á Neyðarlínuna.