Þrettán ára Ís­lendingur í Noregi stefnir á For­múlu 1

Visir ræddi við móður hans, Ragnheiði Vernharðsdóttir, til að fræðast aðeins meira um þennan gríðarlega efnilega ökumann. „Þetta er í raun stórt augnablik fyrir íslenskar akstursíþróttir – að sjá íslenskan fána á verðlaunapalli í svona stóru móti,“ sagði Ragnheiður.

Venni var eini Íslendingurinn sem tók þátt í keppninni en hann náði öðru sæti í tímatöku, áður en að náði síðan þriðja sætinu í keppninni. Aldursflokkurinn sem hann keppir í er tólf til fimmtán ára. Það voru því nokkrir eldri ökumenn en hann sem voru að keppa þarna.

„Venni byrjaði að æfa gokart í Noregi árið 2020, þá átta ára gamall,“ sagði Ragnheiður. Aðeins ári seinna var hann búinn að komast á verðlaunapall í keppni. Hann hefur haldið áfram að vera einn besti ökumaðurinn í sínum aldursflokki á Norðurlöndunum.

„Á síðasta ári (2024) keppti hann fyrir Íslands hönd í ROK Superfinal á Ítalíu, sem er heimsmeistarakeppni ROK gokart flokksins og er mikilvægur áfangastaður á alþjóðlegum gokart ferli. Þá var hann einnig valinn í íslenska landsliðið í Formúlu 4 hermikappakstri árið 2024 – aðeins tólf ára gamall,“ sagði Ragnheiður.

Á núverandi keppnistímabili hefur Venni einnig komist á þrjá verðlaunapalla í Noregi og verið í toppbaráttunni í öllum keppnum sem hann hefur tekið þátt í.

Venni dreymir um að keppa einn daginn í Formúlu 1 eða GT kappakstursseríunni. Hann hefur hins vegar ekki sama aðgengi erlendum keppnum líkt og hinir sem hann er að keppa við.

„Venni stefnir á að keppa í fullri alþjóðlegri seríu í Suður-Evrópu í vetur - en það er mjög háð því hvort við náum að safna inn nægum styrktaraðilum. Því næst er það að komast í Formúlu 4 um leið og hann hefur aldur til, eftir tvö ár,“ sagði Ragnheiður.

Venni horfir mikið á gamlar Formúlu 1 keppnir og heldur mikið upp á Michael Schumacher og Ayrton Senna, og segist horfa á þá til að reyna að læra af þeim.

Einnig heldur hann mikið upp á Ástralann Oscar Piastri, vegna þess hvað hann er rólegur undir pressu. „Piastri er mjög nákvæmur og taktískur – eitthvað sem Venni reynir að tileinka sér sjálfur,“ sagði Ragnheiður.

Fjölskyldan er að flytja til Íslands í lok júlí eftir sex ára veru í Noregi, en ætla að halda áfram með kappakstursævintýrið. Venni stefnir á að keppa í Noregi og Svíðþjóð áfram, ásamt því að reyna að keppa í Bretlandi eða Suður Evrópu.

Kappakstur er dýr, og verður bara dýrari því eldri sem þú verður. Því er Venni að leita sér að öflugum styrktaraðilum, til þess að aðstoða þennan efnilega dreng þar sem fjölskyldan ræður ekki við kostnaðinn ef Venni á að fara mikið lengra.

„Það er ómetanlegt fyrir íslenskt þjóðarstolt að eiga ökumann sem stendur á verðlaunapalli í stórri Norðurlandakeppni og við vonum að Ísland taki nú enn frekar utan um Venna og styðji hann áfram í þessari vegferð,“ sagði Ragnheiður.

Fyrir neðan má sjá upptökur af tímatökunum og keppninni um helgina.