Ekki flaska á að undir­búa sumar­fríið þitt í vinnunni

Hin gullna regla er hins vegar þessi; 

Gefum okkur tíma í að undirbúa sumarfríið í vinnunni og gerum það vel!

Þetta þýðir þá að byrja ágætlega snemma að undirbúa fjarveruna okkar. Sem getur verið þrælskemmtilegt því í stað þess að síðustu dagarnir í vinnunni verði hálfgerð bið eftir langþráða sumarfríinu okkar, líða dagarnir extra hratt því við erum svo upptekin af því að fylgja undirbúningsplaninu okkar.

Sem að miklu leyti snýst um að klára verkefni, en aðeins þau verkefni sem við höfum svo sannarlega rökstutt fyrir okkur sjálfum að eru í forgangi og þurfa að klárast fyrir sumarfrí.

Þessi verkefnalisti er í rauninni stærsta málið: Því þessi verkefnalisti er algengasta gryfjan hjá fólki að falla í; þar sem ætlunin er að klára of margt fyrir frí miðað við tímalínuna eða að forgangsröðunin á verkefnum er ekki rétt, þannig að undir það síðasta ertu að vinna nauðsynleg verkefni alveg í spreng, of mikill tími fór í að vinna verkefni sem mögulega hefðu mátt bíða.

Að forgangsraða verkefnunum og horfa gagnrýnum augum á þennan forgangslista síðustu viku til tíu dagana fyrir frí er því hið besta mál.

Það er líka gott að fara aðeins yfir það, hvað mögulega gæti komið upp á meðan við erum í fríi. Og gefa okkur nokkrar mínútur í að ræða við samstarfsfélaga hvað það er og hvernig væri þá best að leysa úr því.

Þegar þetta samtal er tekið, er hins vegar best að vera svolítið skipulögð; Skrifa niður lista og taka samtalið formlega sem verkefnafund. Fyrir þig og samstarfsfélaga verður öll yfirsýn betri og skiljanlegri og minni hætta á að það þurfi jafnvel að hringja í þig í fríinu til að fara betur yfir einhver atriði. Oft er þetta sami aðilinn og bent er á í Out-of-office tölvupóstinum og því mikilvægt fyrir bæði samstarfsfólk og viðskiptavini að fólk sé vel upplýst.

Sama á líka við um yfirmann þinn. Láttu vita að þú sért búin að klára, eða sért að vinna í því að klára, það sem þú metur að þurfi að klárast fyrir frí. Annað sértu búinn að gera ráðstafanir um að bíði fram yfir frí, upplýsa samstarfsfólk um ef eitthvað kemur upp og svo framvegis. 

Það er alltaf góð tilfinning fyrir alla að finna að hlutirnir eru í góðum farvegi.