Hitaði upp fyrir EM með stór­leik: Vildi ná þrennunni en þjálfarinn sagði nei

Sædís skoraði tvö mörk í leiknum og lagði upp eitt til viðbótar þegar Vålerenga vann 7-0 stórsigur á Hönefoss.

Sædís kom Vålerenga í 1-0 strax á sjöttu mínútu, bætti við öðru marki á 58. mínútu og lagði svo upp þriðja markið fyrir Karinu Saevik á 59. mínútu.

Fyrra markið skoraði Sædís úr markteignum eftir að boltinn datt fyrir hana eftir hornspyrnu en í seinna markinu var hún aftur á réttum tíma eftir darraðardans í teignum og skoraði með góðu skoti úr teignum. Hún sendi síðan Karinu eina í gegn í þriðja markinu.

Vålerenga var því komið í 3-0 eftir klukkutíma leik þökk sé íslenska landsliðsbakverðinum og þjálfari Vålerenga, Nils Lexeröd, ákvað að taka hana af velli á 64. mínútu.

Sædís Rún er þegar komin með þrjú mörk og fimm stoðsendingar í fjórtán deildarleikjum í sumar en hún var með fjögur mörk og sex stoðsendingar í sextán leikjum í fyrra.

Sædís var maður leiksins og Vålerenga sýndi mörkin hennar og tók hana í stutt viðtal á miðlum sínum eftir leikinn.

„Auðvitað vildi ég ná þrennunni en Nils [Lexeröd, þjálfari] sagði nei ,“ sagði Sædís Rún brosandi.