Eru með 28 husky hunda inn á heimilinu sínu

Hér erum við að tala um hjónin Maríu Björk Guðmundsdóttur og Gunnar Eyjörð Ómarsson hjá Gohusky hundum, sem eru með sleðahundafyrirtæki á bænum Glæsibæ í Hörgársveit í Eyjafirði. Það er alltaf meira en nóg að gera hjá þeim að sinna áhugasömum erlendum ferðamönnum, sem vilja fara í ferðir með þeim og hundunum þeirra.

Og nú stendur mikið til því hjónin hafa skipulagt Husky hundakeppni í Hálsaskógi í Eyjafirði, sem er rétt norðan við Akureyri, helgina 27-29 júní þar sem allir eru velkomnir að fylgjast með.

En út á hvað gengur keppnin, Gunnar svarar því?

„Í ár verður keppt í 15 greinum og ég er komin með yfir 60 skráningar. Þetta er aðallega gert til að hafa gaman. Við erum búin að vera í hundum núna í að verða 15 ár,” segir Gunnar og bætir við.

„Í dag eru flestir vinir mínir með hunda þannig að þetta er líka svona hittingur. En jú, jú, þetta er náttúrulega stórt mót en fyrir mér er þetta bara gaman aðallega. Keppnin fer fram í skóginum og ég er með mislangar brautir Þar,” segir Gunnar.

Gunnar segir að starfsemi GOhusky gangi ótrúlega vel því á hverjum degi séu erlendir ferðamenn sem vilja fara í gönguferðir með þeim hjónum og hundunum og þeir vilja líka fá að vita allt um tegundina Husky.

„Við erum með 28 hunda og við erum svo klikkuð að við erum með þá inni hjá okkur,” segir Gunnar hlæjandi.

Og er það bara ekkert mál eða hvað?

„Þeir fara rosalega mikið úr hárum en Husky hundar lykta ekki, ekki eins og svona hundalykt mikil, það er mjög lítil lykt af þeim því þeir eru sjálfshreinsandi því þeir eru alltaf að fara úr hárunum,” segir Gunnar.

Heimasíða fyrirtækisins