Eva Fretheim hlaut Glerlykilinn

Í tilkynningu segir að Fuglekongen hafi verið framlag Noregs til Glerlykilsins í ár, þar sem bókin hafi unnið Gullnu marghleypuna, verðlaun norska Rivertonklúbbsins, fyrir bestu norsku glæpasöguna 2024.

„Þetta er spennandi og listilega fléttuð glæpasaga saga af skelfilegum atburðum í litlu samfélagi, atburðum, sem varpa skugga á líf þorpsbúa og leiða að lokum til nýrra ódæða mörgum árum síðar.

Í þessari sérlega vel skrifuðu og margslungnu sögu tekst höfundinum að draga lesandann með sér inn í sannfærandi og lifandi söguheim þar sem samfélagi og persónum er lýst af djúpri innsýn, raunsæi og miklu listfengi.

Í rökstuðningi dómnefndar Rivertonklúbbsins fyrir því að veita Evu Fretheim Gylltu marghleypuna fyrir Fuglekongen segir meðal annars að hún sé glæpasaga „þar sem manneskjur og náttúra birtast hlið við hlið í fágaðri en æsispennandi og karakterdrifinni frásögn (...) Önnur glæpasaga Fretheims er lágstemmt sálfræðidrama, þar sem að því er virðist sakleysislegir hlutir gerast undir miklu álagi, þar sem falin tengsl […] og jafnvel myrkustu leyndarmál afhjúpast hægt en óumflýjanlega. (...)“

Aðrar glæpasögursem tilnefndar voru til Glerlykilsins 2025:

• Fadi eftir Kale Puonti, Finnland
• Heim fyrir myrkur eftir Evu Björgu Ægisdóttur, Ísland
• Tælle til en, tælle til to eftir Søren Sveistrup, Danmörk
• Din tid kommer eftir Carl-Johan Vallgren, Svíþjóð

Um Glerlykillinn

Glerlykillinn er viðurkenning sem veitt er fyrir bestu norrænu glæpasöguna og dregur nafn sitt af glæpasögu bandaríska rithöfundarins Dashiell Hammett, The Glass Key. Verðlaunagripurinn er lykill sem mótaður er úr gleri. Hann er veittur árlega fyrir glæpasögu eftir höfund frá Danmörku, Finnlandi, Íslandi, Noregi eða Svíþjóð.

Glæpasagnafélög Norðurlandanna fimm tilnefna hvert um sig eina bók til verðlaunanna. Fimm þriggja manna dómnefndir, ein frá hverju landi, kjósa svo sigursöguna úr þeirra hópi.

Glerlykillinn er mikilvægasta viðurkenningin í heimi norrænna glæpasagna og hefur verið veittur frá 1992. Lengi framan af var það Skandinaviska kriminalsällskapet (SKS), sem veitti verðlaunin, en SKS voru regnhlífarsamtök norrænu glæpasagnafélaganna fimm: Svenska deckarakademin (SE), Det danske kriminalakademi (DK), Rivertonklubben (NO), Suomen Dekkariseura (FI) og Hið íslenska glæpafélag (IS). Eftir að SKS lagði upp laupana fyrir nokkrum árum hafa félögin fimm haldið samstarfinu um Glerlykilinn áfram.