Ók á gangandi veg­far­enda og keyrði burt

Slysið átti sér stað í umdæmi lögreglustöðvar þrjú sem sér um verkefni í Kópavogi og Breiðholti. Einn einstaklingur var fluttur á slysadeild með áverka en ekki er vitað um líðan hans að svo stöddu. Ekki liggja fyrir upplýsingar um hver ökumaðurinn, sem keyrði á brott, er.

Þetta kemur fram í dagbók lögreglu á höfuðborgarsvæðinu. Einnig bárust tilkynningar um þjófnað í verslun í Hlíðunum og í verslun í hverfi 108. Talsvert af vörum var stolið í síðarnefndri verslun en gerandinn fannst ekki þrátt fyrir leit.

Einnig barst tilkynning um brot í stofnun í miðbæ Reykjavíkur. Gerandi hafði brotið upp hurð og unnið eignaspjöll innandyra. Samkvæmt lögreglu er málið enn í rannsókn.

Lögregla sinnti einnig umferðareftirliti og stöðvaði meðal annars ökumann sem keyrði á 125 km/klst hraða á götu þar sem leyfilegur hámarkshraði er 80 km/klst. Ökumaðurinn var einnig undir áhrifum áfengis og var hann handtekinn á vettvangi.