Aftur logar eldur í Læradal

Í janúar ársins 2014 kviknaði eldur í gamla bænum í Læradal. Tugir húsa urðu eldinum að bráð og slökkviliðið átti fullt í fangi með að ná stjórn á eldsvoðanum vegna slæmra veðurskilyrða. Um fjórðungi bæjarins var gert að yfirgefa heimii sín. Nú hefur eldur kviknað í gamla bænum á nýjan leik.

Samkvæmt nýjustu fréttum VG loga nú fjögur hús og slökkviliðið hefur ekki náð stjórn á eldinum. Kommúnan hefur komið upp sérstöku viðbraðgsteymi. Engan hefur sakað samkvæmt norskum miðlum.

Eldurinn kom upp í gömlu húsi í miðbæ Læradalseyrar, elsta hluta bæjarins, og því eru mikil söguleg verðmæti í hættu. Eldurinn hefur breitt úr sér til þriggja annarra húsa en öll eru þétt upp hvort við annað. Þrjú húsanna hafa orðið fyrir altjóni.

Slökkviliðsstjóri sem VG ræddi við segir að þrátt fyrir að slökkviliðinu hafi ekki enn tekist að ráða niðurlögum eldsins sé engin hætta á að hann dreifi frekar úr sér og úr verði hörmungarástand líkt og fyrir tíu árum síðan.

Þrjátíu manns hefur verið gert að yfirgefa heimili sín og þau eru í skjóli á gistihúsi í nágrenninu. Unnið er að því að koma fólki undan Eyrargötu, þar sem eldurinn kom upp. Ekki hefur verið tilkynnt um að neins sé saknað en lögregla viðurkennir að enn ríki hálfgert „upplausnarástand.“

„Við erum að tala um 250 ára sögu. Þetta er mjög, mjög sorglegt,“ segir íbúi á svæðinu í samtali við VG.

Annar íbúi segist hafa verið í búðinni þegar hann varð var við reykinn sem barst úr elstu húsum bæjarins.

„Þetta eru allra elstu byggingarnar í bænum. Við vorum hrædd um að þær færu í stórbrúnanum 2014, og nú loga þær. Þetta er alveg hræðilegt,“ segir hann.