Rignir enn fyrir norðan þótt heldur hafi dregið úr á­kefðinni

„Það hefur áfram rignt svolítið en þó fór aðeins að draga úr ákefðinni undir lok nætur“, segir Eiríkur Örn Jóhannesson Veðurfræðingur sem stóð vaktina í nótt.

Hann segir að það komi betur í ljós nú í morgunsárið hvort einhverjar skriður hafi runnið fram. Hvað framhaldið varðar segir Eiríkur Örn að það muni rigna áfram á norður- og norðausturlandi þó ákefðin verði ekki eins mikil og verið hefur. „En á meðan þar er rigning þá sjatnar ekkert í jarðveginum og þá er áfram viðvarandi þessi skriðuhætta og því verðum við með áframhaldandi viðvaranir í gildi vegna úrkomu fram á aðfrarnótt morgundagsins.“

Í gær gaf lögreglan á Norðurlandi eystra það út að íbúar Ólafsfjarðar sem búa í efstu götum bæjarins ættu ekki að dvelja í þeim hluta húsa sinna sem hafi glugga eða dyraop sem snúi upp í fjallshlíðina. Ekki var talin þörf á rýmingu í bænum en að það gæti breyst ef aðstæður fara á verri veg.

Þá bendir lögregla á að ofan byggðarinnar í Ólafsfirði séu fráveituskurðir sem eru hannaðir til að draga úr skriðuhættu og hafa þeir sannað gildi sitt vel hingað til.