Fá­dæma úr­helli á Ólafs­firði

Jóhann K. Ólafsson, slökkviliðsstjóri fjallabyggðar, segir að slökkviliðið hafi verið kallað út klukkan hálf eitt í dag til aðstoðar á Ólafsfirði, og aðgerðum hafi lokið um níuleytið í kvöld.

Aðallega hafi þurft að dæla vatni frá lægstu punktum bæjarins, við íþróttahúsið og sundlaugina.

„Við dældum því í tjörnina því þar er útrás sem fer beint út í sjó. En eina hættan ef einhver hætta getur talist, það var aðeins farið að seitla inn í tækjarýmið í sundlauginni en við stoppuðum það bara og náðum að halda því niðri,“ segir hann.

„Þetta gekk bara vonum framar, og það hjálpaði til að það dró úr úrkomu klukkan átta í kvöld,“ segir hann.

Áfram er spáð talsverðri úrkomu á norðanverðu landinu á morgun þar sem snjóa mun í efri hluta fjalla en rigna neðar. Viðvörun er í gildi vegna skriðuhættu og vatnavaxta á Norðurlandi og Norðausturlandi.

Tilkynnt hefur verið um tvær skriður í dag sem og tvö snjófljóð.