Skipu­lagði á­rásina í Colorado í heilt ár

Mohamed Sabry Soliman heitir árásarmaðurinn og var dreginn fyrir dómara í dag. Hann hefur verið ákærður fyrir tilraun til manndráps í sextán ákæruliðum og fyrir hatursglæp. Þá er hann ákærður fyrir notkun íkveikjutækis í tveimur ákæruliðum og fyrir tilraun til notkunar slíks tækis í sextán ákæruliðum.

Í frétt CNN um málið segir að við yfirheyrslu hafi Soliman sagst vilja drepa alla síonista og að hann hafi skipulagt glæpinn í heilt ár. Hinir særðu eru á aldrinum 52 til 88 ára. 

Eins og fram hefur komið er Soliman gefið að sök að hafa notað eldvörpur og mólótóv-kokteila til að kveikja í fólki sem mótmælti gíslatöku Hamas-samtakanna á ísraelskum borgurum. 

Alríkislögreglan í Bandaríkjunum rannsakar árásina sem hryðjuverk. 

Soliman, sem er 45 ára Egypti er sagður hafa öskrað slagorð gegn Ísrael um leið og hann henti eldsprengjum inn í hópinn.