Villeneuve leik­stýrir næstu mynd um James Bond

Amazon greindu frá ráðningunni í tilkynningu rétt eftir miðnætti í gær. 

Myndin verður sú 26. um spæjarann en sú fyrsta sem Amazon MGM Studios framleiða. Myndin verður framleidd af þeim Amy Pascal og David Heyman og yfirframleiðandi verður Tanya Lapointe. Enn er leitað að næsta Bond en ýmsir leikarar hafa verið orðaðir við hlutverkið.

Amazon keypti MGM Studios fyrir 8,5 milljarða Bandaríkjadala árið 2021 og sýningarréttinn að James Bond. Broccoli-fjölskyldan, sem hafði átt réttinn að James Bond frá 1962, hélt þó fullri stjórn yfir þróun seríunnar (e. creative control) og voru treg til við að halda áfram með seríuna. Amazon MGM keyptu Barböru Broccoli og Michael G. Wilson út í febrúar og er stúdíóið því komið með fulla stjórn á seríunni.

Fylgst hefur verið náið með leikstjórnarleitinni fyrir næstu Bond-mynd frá því Amazon tók yfir og var fjöldi leikstjóra orðaður við myndina, þ.á m. Edward Berger, Edgar Wright, Jonathan Nolan, Paul King og Cuarón, sem hefur unnið mikið með framleiðandanum Heyman gegnum tíðina.

Kann að gera stórmyndir

Ráðning Villeneuve kemur kannski einhverjum á óvart þar sem hann er í miðjum klíðum að gera geimepíkina Dune: Messiah sem fylgir eftir fyrri myndunum tveimur sem komu út 2021 og 2024. Tökur á þriðju myndinni standa enn yfir og kemur hún ekki út fyrr en 16. desember 2026.

Villeneuve hefur hins vegar sýnt og sannað að hann er fullfær um að gera stórar stúdíómyndir, á undan Dune-myndunum leikstýrði hann sæfæ-myndinni Blade Runner 2049 (2017), Arrival (2016) og Sicario (2015).

„Sumar af mínum fyrstu bíó-minningum tengjast 007. Ég ólst upp við að horfa á James Bond-myndir með pabba mínum, alveg frá Dr. No með Sean Connery. Ég er ódrepandi Bond-aðdáandi. Fyrir mér er hann heilagur. Ég ætla mér að heiðra hefðina og opna slóðina fyrir mörg ný verkefni,“ sagði Villeneuve í tilefni af ráðningunni.