Kol­beinn er WBF heims­meistari

Bardaginn var stöðvaður við upphaf sjöundu lotu þegar að Lehnis sá sér ekki fært að hefja lotuna eftir að hafa tekið við þungum höggum frá Kolbeini. WBF heimsmeistarabeltið kemur því heim til Íslands með Kolbeini. Beltið er sjötta stærsta beltið í þungavigtarflokknum í hnefaleikaheiminum, stórt og mikilvægt fyrir næstu skref Kolbeins á ferlinum.

Sigurinn sér til þess að Kolbeinn er ósigraður á sínum atvinnumannaferli, hann hefur nú unnið átján bardaga í röð og með sigrinum í kvöld mun hann fikra sig ofar á lista yfir hundrað bestu þungavigtarkappa í heimi. Lehnis var einnig ósigraður fyrir bardaga kvöldsins en er það ekki lengur.

Eftir góða byrjun var allur vindur úr Þjóðverjanum eftir fyrstu sex lotur bardagans og þegar að hann gerði sig ekki líklegan til þess að standa upp og hefja leika í sjöundu lotu fékk dómari bardagans nóg og flautaði hann af.

Heimamenn í Nürnberg voru ekki sáttir og var plastglasi meðal annars kastað inn í hnefaleikahringinn en ekki er hægt að gagnrýna þessa ákvörðun dómarans því ekki var þetta í fyrsta sinn í bardaganum sem Lehnis virtist ganga á gufunni einni saman. 

Frétt uppfærð með réttum upplýsingum um heimsmeistarabeltið sem Kolbeinn vann sér inn.