Fær þyngri dóm fyrir að nauðga konu, taka það upp og senda henni

Dómur var kveðinn upp í Landsrétti í dag. Refsing Elmars var ákveðin fjögur ár og honum gert að greiða brotaþola miskabætur upp á þrjár milljónir króna ásamt vöxtum og dráttarvöxtum. Héraðsdómur Reykjavíkur hafði áður dæmt Elmar til þriggja og hálfs árs fangelsisvistar og greiðslu 2,2 milljóna króna í miskabætur.

Í fyrra málinu var Elmari gefið að sök að nauðga konu á meðan hún lá sofandi eða meðvitundarlítil í rúmi. Í ákæru sagði að hann hafi notfært sér að hún gæti ekki spornað við verknaðinum vegna áhrifa áfengis og svefndrunga. Seinni nauðguninni er lýst á mjög líkan hátt í ákærunni, en hún beindist að sömu konu. Helsti munurinn á lýsingunum tveimur var að það fyrra átti sér stað á heima hjá honum að degi til, en seinni heima hjá henni að nóttu til.

Þá var honum gefið að sök að hafa útbúið myndskeið af brotunum, án samþykkis eða vitneskju konunnar. Hann hafi síðan komið myndefninu fyrir á minnislykli sem hann setti síðar í póstkassa konunnar.

Ítarlega var fjallað um málið þegar dómur féll í héraðsdómi á síðasta ári: 

Landsréttur staðfesti sakfellingu Elmars í héraði í ákæruliðum sem sneru að nauðgununum tveimur, auk þess sem hann staðfesti sakfellingu fyrir upptöku brotanna og heimfærði undir ákvæði hegningarlaga um blygðunarsemisbrot.

Auk miskabóta var Elmari gert að greiða allan áfrýjunarkostnað málsins, rúmlega 1,9 milljónir króna.