Þjónusta hjálparsímans tryggð

Greint var frá því í kvöldfréttum Stöðvar 2 á dögunum að Rauði krossinn stæði frammi fyrir því að skerða þjónustuna og loka símaverinu á nóttunni vegna rekstrarvanda, á sama tíma og símtölum frá fólki í sjálfsvígshugleiðingum fjölgar á milli ára. 

Alma Möller, heilbrigðisráðherra, Inga Sæland, félags- og húsnæðismálaráðherra og Guðmundur Ingi Kristinsson, mennta- og barnamálaráðherra skrifuðu undir samning um fjármögnunina í dag.

Gísli Rafn Ólafsson, framkvæmdastjóri Rauða krossins, segir framlagið skipta sköpum og að nú sé hægt að halda símanum opnum allan sólarhringinn.

Í tilkynningu frá Rauða krossinum segir að heilbrigðisráðherra hafi haft forgöngu um málið þegar ljóst var að fjármagn skorti til reksturs Hjálparsímans og við blasti að skerða þyrfti þjónustuna. 

Verkefnastjóri hjá 1717 sagði í viðtali í kvöldfréttum Stöðvar 2 að ríflega sex hundruð svokölluð sjálfsvígssímtöl hefðu borist það sem ári en þau voru fjögur hundruð og þrjátíu á sama tímabili í fyrra. Á fyrstu 23 dögum marsmánaðar hafi starfsfólk 1717 haft samband við Neyðarlínu oftar en tuttugu sinnum en það sé aðeins gert ef talið sé að viðkomandi sé í bráðri hættu.