Sprenging í Íran varð 25 að bana

Mikill eldur kviknaði í kjölfar sprengingarinnar, sem varð á höfninni Shahid Rajaee, stærstu verslunarhöfn landsins. Eldurinn dreifði sér milli gáma og er slökkvilið enn að ráða niðurlögum eldsins. Gluggar í allt að sjö kílómetra fjarlægð frá höfninnni brotnuðu í sprengingunni. 

Tildrög sprengingarinnar liggja enn ekki fyrir en Reuters hefur eftir fulltrúa almannavarna í Íran að líklega hafi eldfim efni komist í snertingu hvort við annað og valdið sprengingunni. Sá kennir lélegum skilyrðum til geymslu eiturefna á höfninni um. Yfirmaður almannavarna hafi nýlega gert úttekt á höfninni og varað við mögulegri hættu. 

Íranir eiga sem stendur í samningaviðræðum við Bandaríkjamenn um þróun kjarnorkuvopna í landinu í Óman. Vakin er athygli á þessu í frétt Reuters en ekkert bendir til þess að sprengingin tengist viðræðunum á nokkurn hátt. 

Íbúar í borginni segjast hafa fundið fyrir áhrifum sprengingarinnar allt að fimmtíu kílómetrum frá höfninni. Skólum og öðrum stofnunum á svæðinu hefur verið lokað út daginn.