Gullbakka stolið á Skóla­vörðu­stíg: „Þetta eru galdra­menn“

Bolli segir að þjófagengi sem telur átta manns hafi framkvæmt þjófnaðinn, en hann er búinn að birta myndir af þeim sem hann grunar um verknaðinn á Facebook.

„Ég veit að ég fæ þetta aldrei til baka. En ég er bara að reyna að vara fólk við. Ef það sér þetta fólk, þá eru þau stórhættuleg.“

Hann segist hafa áreiðanlegar heimildir fyrir því að um sé að ræða gengi sem hafi leikið fólk grátt á ferðamannastöðum, líkt og á Þingvöllum, með vasaþjófnaði.

Mynduðu vegg í stappaðri búðinni

„Þau komu átta og mamma var að vinna þarna ein. Tvö þeirra tóku hana frá, héldu henni upptekinni. Svo komu þau inn, eitt af öðru, þannig hún var alveg stöppuð búðin,“ segir Bolli, sem tekur fram að fyrir hafi verið ein kona í búðinni sem tengist málinu ekki.

„Þau bjuggu alveg til vegg þegar þau tóku bakkann.“

Bolli veit ekki til þess að lögreglan hafi haft hendur í hári gengisins. Það gæti reynst erfitt. Bolli telur að meðlimir gengisins dvelji á gistiheimilum en haldi sig einungis í eina nótt á hverjum stað. Þau séu því sífellt á ferðinni.

„Þau kunna þetta bara. Þetta er eins og er verið að vara mann við í Barselóna. Þetta eru galdramenn.“