Jón Guðni Fjóluson leggur skóna á hilluna

Víkingar verða því án þessa öfluga miðvarðar í Bestu deildinni í sumar en fyrsti leikur Víkings er á móti Eyjamönnum á mánudaginn

Jón Guðni kom til Víkingsliðsins í ársbyrjun 2024 eftir að hafa verið frá knattspyrnu í um það bil tvö ár vegna slæmra meiðsla. Þrátt fyrir mikla baráttu við meiðsli náði Jón samt sem áður að spila 37 leiki fyrir Víkings hönd, þar af sautján í Bestu deildinni og fimmtán leiki í Evrópukeppni.

Jón Guðni spilaði á ferli sínum í Belgíu, Svíþjóð, Rússlandi og Noregi ásamt því að spila átján landsleiki fyrir Íslands hönd.

„Jón Guðni er frábær liðsfélagi og á sínum hápunkti var hann algerlega frábær hafsent með líkamsburði sem fáir hafa séð á Íslandi. Það er með miklum söknuði sem við kveðjum Jón Guðna því betri liðsmann er erfitt að finna en jafnframt óskum við honum alls hins besta í framtíðinni,“ sagði Kári Árnason, yfirmaður knattspyrnumála hjá Víkingi.