Danir til­búnir að senda friðargæsluliða

Lars Løkke Rasmussen utanríkisráðherra og Troels Lund Poulsen varnarmálaráðherra tilkynntu þetta eftir fund með utanríkisnefnd þingsins. Þar gerðu þeir grein fyrir afstöðu ríkisstjórnarinnar og hlutu stuðning þingsins.

„Það er mikilvægt að við í Evrópu sendum rétt skilaboð bæði til Pútíns og Washington. Það er það sem við gerum með því að segja: Komi til þess að evrópsk viðvera verði nauðsynlegt til að hægt verði að koma á samkomulagi um vopnahlé eða friðarviðræður er Danmörk tilbúin í þeim efnum,“ hefur danska ríkisútvarpið eftir Lars Løkke Rasmussen utanríkisráðherra.

Troels Lund Poulsen varnarmálaráðherra segist ekki sjá fyrir sér að Atlantshafsbandalagið komi til með að taka af skarið og senda friðargæsluliða að landamærunum heldur muni fjöldi einstakra landa ákveða að sýna stuðning sinn með þessum sama hætti og Danmörk.

„Ég held að allir hafi áttað sig á því að Bandaríkjaforseti vilji að stríðinu ljúki hratt. Enginn óskar þess heitar en Úkraína. Við óskum þess einnig. En því skal ljúka á réttan hátt,“ segir Lars Løkke Rasmussen.