Fyrr­verandi að­stoðar­maður skellir sér aftur í aug­lýsingarnar

Í fréttatilkynningu segir að Sigtryggur sé alls ekki ókunnugur auglýsingabransanum. Hann hafi starfað þar á árunum 2005 til 2018, fyrst hjá Íslensku auglýsingastofunni, þar sem hann hafi gengt meðal annars stöðu sköpunarstjóra, og síðar hjá Hvíta húsinu.

„Gott að koma aftur heim“ 

Samhliða auglýsingum hafi Sigtryggur einnig unnið í leikhúsi, og leikrit hans hafi verið sett upp og gefin út hér á landi, í Bandaríkjunum og Þýskalandi.

„Það er gott að koma aftur heim í auglýsingaland. Peel hefur verið leiðandi í skapandi auglýsingagerð og er sú auglýsingastofa sem hefur unnið flest alþjóðleg verðlaun á síðustu árum. Ég hlakka til að taka þátt í því verkefni, leggja mitt af mörkum í auglýsingagerðinni og jafnframt hjálpa til við að stækka og þróa vöruborð Peel með fjölbreyttri ráðgjöf,“ er haft eftir Sigtryggi.

Búi yfir einstökum reynslubanka

Þá segir að Peel sé í sókn og ráðningin marki fyrsta skrefið í því að auka þjónustu og breikka vöruframboð fyrir viðskiptavini stofunnar. 

„Við erum afar spennt að fá Sigtrygg til liðs við Peel. Hann býr yfir einstökum reynslubanka úr bæði auglýsingum og skapandi greinum, sem mun styrkja okkur enn frekar. Sigtryggur mun leiða hugmyndadeild Peel í hlutverki sköpunarstjóra og við hlökkum til að sjá hann setja sitt mark á verkefnin okkar,“ er haft eftir stjórn Peel.

Með þessum skrefum hafi Peel áfram að byggja upp auglýsingastofu framtíðarinnar – þar sem sköpun, stefnumótun og hugrekki mætist til að skapa raunveruleg verðmæti fyrir fyrirtæki.