Sjá auknar líkur á eld­gosi í kortunum

Jarðskjálftavirkni frá því að síðasta eldgosi lauk, 9. desember síðastliðinn, þar til dagsins í dag hefur  samkvæmt tilkynningunni verið mest áberandi í kringum Trölladyngju og aðeins í Fagradalsfjalli, en virknin hefur verið mjög lítil í kringum Sundhnúk og Svartsengi.

Í tilkynningu segir einnig að GPS-mælingar sýni að hraði landriss hafi minnkað örlítið á síðustu vikum. Það geti verið varasamt að túlka einstaka GPS-punkta því truflun á þessum árstíma valdi því að breytileiki milli daga sé meiri vegna veðuraðstæðna. Í staðinn þurfi að horfa á mælingar yfir lengri tíma, en þær sýni áframhaldandi landris.

Líkur á kvikuhlaupi aukast um mánaðamót

Þá kemur fram að samkvæmt líkanreikningum megi því enn gera ráð fyrir því að líkur á kvikuhlaupi og jafnvel eldgosi á Sundhnúksgígaröðinni fari að aukast í lok janúar eða byrjun febrúar

„Atburðarásin er því enn í fullum gangi og er að þróast mjög svipað og fyrir síðustu gos. Samkvæmt líkanreikningum mun rúmmál kviku undir Svartsengi ná neðri mörkum í lok janúar eða byrjun febrúar. Þetta þýðir að það má gera ráð fyrir því að líkur á kvikuhlaupi og jafnvel eldgosi á Sundhnúksgígaröðinni fari að aukast frá þeim tíma,“ segir í tilkynningunni.

Hættumat frá 14. janúar er enn í gildi en verður uppfært 28. janúar, að öllu óbreyttu. Í tilkynningu segir að það muni taka mið af auknum líkum á kvikuhlaupi og jafnvel eldgosi samkvæmt fyrrnefndri tímalínu.