Aldrei of mikið af G-víta­míni

Í ár selur félagið dagatal með svokölluðum G vítamínskömmtum sem eru ráðleggingar sem er ætlað að bæta geðheilsu. Í völdum dagatölum leynast svo geðræktandi vinningar.

Á næstu 30 dögum munu birtast hér á Vísi greinar sem fjalla um átakið, auk þess sem eitt G vítamín mun birtast á forsíðunni á Vísi daglega meðan átakið stendur yfir. Einnig munu útvarpsstöðvarnar Bylgjan, FM957 og X977 vekja athygli á átakinu, fjalla um G vítamín dagsins og fjalla almennt um geðheilbrigði.

„G-vítamínum hefur verið tekið mjög vel frá því við fórum fyrst af stað með verkefnið á þorranum 2021,“ segir Svava Arnardóttir, formaður Geðhjálpar. „Fólk er farið að nota G-vítamín í daglegu tali þegar um er að ræða geðrækt og það er algjörlega frábært enda markmið okkar að sem flest séu meðvituð um geðheilsu sína og hvað sé hægt að gera til að hlúa að henni.“

En hvers vegna er þessi árstími valinn?

„Við erum öll misjöfn og ekki hægt að fullyrða of mikið þegar kemur að geðslagi þjóðar en fyrstu mánuðir ársins á Íslandi geta reynst mörgum nokkuð flóknir. Myrkrið, kuldinn, spennufallið eftir hátíðirnar og síðan metnaðarfull, og gjarnan opinber, markmið um að verða sífellt betri og skara fram úr, eru ekki endilega uppskrift að geðheilbrigðu umhverfi.“

Það kemur ekki bara upp úr þurru máltakið „að þreyja þorrann“ sem hefur fylgt þjóðinni í allar þessar aldir bætir Svava við. „Þess vegna völdum við þennan tíma til að minna á geðrækt og mikilvægi hennar en gera það jafnframt þannig að fólk átti sig á því hvað getur í rauninni verið einfalt að stunda hana.“

G vítamín dagatalið kostar 2.900 kr. og er hægt að kaupa það á vef Geðhjálparog í völdum verslunum Krónunnar. Allur ágóði þess rennur í Styrktarsjóð geðheilbrigðis en tilgangur sjóðsins er að stuðla að framförum í geðheilbrigðismálum með því að veita styrki til verkefna sem geta bætt geðheilbrigði landsmanna og auka skilning á geðheilsu og geðrænum vanda.

Meðan átakið stendur yfir munu birtastt daglega góð ráð á gvitamin.is, Facebook og Instagram.

Þau sem vilja styrkja Geðhjálp geta lagt það sem þau vilja inn á styrktarreikning 357-22-2095, kennitölu 531180-0469. Einnig er hægt að smella hér til að styrkja í gegnum netið.