Nýr flug­völlur opnar nýjar dyr fyrir Suður-Grænland

Í fréttum Stöðvar 2 var stærsti bær Suður-Grænlands, Qaqortoq, heimsóttur en þar búa um þrjú þúsund manns. Á veturna, þegar ís hindrar siglingar til Narsarsuaq-flugvallar, er dýrt þyrluflug eina leið íbúa bæjarins til að komast á flugvöllinn og síðan þaðan til annarra byggða Grænlands eða út í heim.

En núna er kanadískur verktaki að leggja nýja flugbraut í útjaðri Qaqortoq. Samtímis reisir grænlenskur verktaki flugstöð og þjónustuhús en byggingarnar urðu fokheldar í haust.

Flugbrautin verður 1.500 metra löng, litlu styttri en lengsta braut Reykjavíkurflugvallar, og mun því hæglega getað tekið við öllum vélum íslenska innanlandsflugsins, og jafnvel einnig smærri og meðalstórum farþegaþotum.

Hótelstjóri og eigandi aðalhótelsins í Qaqortoq, Jim Riis, segir völlinn skapa mikil tækifæri, ekki síst í millilandaflugi.

„Þetta hefur gríðarlega þýðingu ef við þorum að grípa tækifærið. Við höfum lengi beðið eftir þessu en núna hefjumst við handa.

Þetta þýðir að það opnast dyr til umheimsins og annarra hluta Grænlands. Það er það sem við viljum,“ segir Jim Riis.

Flugvöllurinn í Narsarsuaq, sem Bandaríkjaher gerði á stríðsárunum, er í dag sá eini á Suður-Grænlandi en hefur þann galla að vera fjarri helstu bæjum. Erlendir starfsmenn gullleitarfélags Elds Ólafssonar sjá fram á verulegt hagræði með flugvelli við Qaqortoq.

„Þessi nýi flugvöllur mun stytta tímann fyrir starfsfólkið okkar að koma inn. Hann mun stytta tímann til að koma fólki inn og út,“ segir Eldur, sem er stofnandi og forstjóri Amaroq-málmvinnslufélagsins.

„Það á að vera auðveldara að lenda þarna, miðað við þar sem flugvöllurinn er núna. Það verður hægt að koma stærri flugvélum inn. Þannig að þetta mun hafa alveg gígantísk áhrif.

Ekki bara fyrir okkar starfsemi heldur alla starfsemi á Suður-Grænlandi, túrisma og annað,“ segir Eldur.

Upphaflega átti flugvöllurinn að vera tilbúinn árið 2023. Það reyndist hins vegar þrautin þyngri að þoka verkefninu af stað. Núna gera áætlanir ráð fyrir að völlurinn verði tilbúinn eftir rúmt ár.

Hótelstjórinn lýsir stemmningunni gagnvart flugvallagerðinni.

„Bjartsýni. Það er þessi bjartsýni sem við þurfum að byggja á,“ segir Jim Riis.

„Okkur hefur verið haldið niðri í mörg ár. Það er búið að tala um þennan flugvöll í tuttugu ár. Nú kemur hann, nú kemur hann! En hann kom aldrei.

En nú er hann þarna, við vitum að hann kemur. Þá erum við tilbúin að taka á móti umheiminum,“ segir hótelstjóri Hótels Qaqortoq.

Hér má sjá frétt Stöðvar 2: