Störðu á hvor annan í ellefu mínútur

Fury og Usyk mætast í Sádi-Arabíu á laugardaginn. Usyk vann bardaga þeirra í maí á þessu ári en það var fyrsta tap Furys á ferlinum.

Hvorugur þeirra hafði mikið að segja á blaðamannafundinum. Eftir hann var komið að störukeppninni þar sem keppendur standa á móti hvor öðrum. Hún stóð öllu lengur en búist var við.

Fury og Usyk störðu nefnilega á hvor annan í ellefu mínútur og tuttugu sekúndur. Skipuleggjendur bardagans reyndu að stöðva störukeppnina en boxararnir gáfu sig ekki.

Á endanum byrjuðu þeir að munnhöggvast og Fury var svo dreginn í burtu meðan hann öskraði á Usyk.

Úkraínumaðurinn hefur unnið alla 22 bardaga sína á atvinnumannaferlinum. Fury er með 34 sigra, eitt jafntefli og eitt tap í 36 bardögum.